ԵՐԵՎԱՆ, 3 փետրվարի — Sputnik. Լեհական «Նատուր պրոդուկտ» ընկերության «Անտիգրիպին» դեղը շրջանառությունից դուրս է հանվել։ ՀՀ առողջապահության նախարարության դեղորայքային քաղաքականության բաժնի պետ Անահիտ Մկրտչյանը հայտնեց, որ դեղը Հայաստանում գրանցված է, հետևաբար այն սերիաները, որոնք օրինական ճանապարհով են ներմուծվում Հայաստան, համապատասխան ստուգման են ենթարկվում։
«Նշյալ խմբաքանակի վերաբերյալ նշեմ, որ այն լաբորատոր փորձաքննության չի ենթարկվել։ Առողջապահության նախարարությունը տվյալ սերիային թույլտվություն չի տվել, այն ներկրվել է ապօրինի ճանապարհով»,-ասաց Մկրտչյանը։
Sputnik Արմենիայի այն հարցին, թե ինչպես է հնարավոր դառնում դեղերի ապօրինի ներմուծումը, եթե ներմուծման կարգը խստացվել է, ԱՆ դեղորայքային քաղաքականության բաժնի պետը պատասխանեց` քանի որ դեղը ներմուծվել է ԵՏՄ շրջանակում, այն մաքսային պահեստ չի անցել։
«Այդ դեպքում ներմուծողն արտադրանքը տեղափոխել է իր պահեստ, փորձաքննության չի ներկայացրել, ներկրողը շրջանցել է կարևոր գործողությունը և անմիջապես հանել վաճառքի»,- ասաց Մկրտչյանը։
Այլ երկրներից ներմուծման պարագայում դեղը մտնում է մաքսային պահեստ. մինչև նախարարության թույլտվությունը չի լինում, այնտեղից դեղը դուրս չեն բերում։
Ըստ Մկրտչյանի` դեղատներն էլ այստեղ մեղքի բաժին չունեն, քանի որ ընկերությունն այն հանձնել է հաշիվ-ապրանքագրով։
Տնտեսագետ Վարդան Բոստանջյանն այս հարցում մեղավորությունը չի բարդում միասնական տնտեսական շուկայի ներդրված մեխանիզմների վրա։
«Մաքսազերծում չանցնելը չի նշանակում, որ որակական հատկությունները պետք է անտեսվեն։ Տեղի է ունեցել ընթացակարգի խախտում, շրջանցում, որը կարող է ազդեցություն ունենալ առողջության, գների սահմանման, իրացման վրա։ Այստեղ ԵՏՄ-ի անվան տակ խմբաքանակին վերաբերող լուրջ հարցեր են շրջանցել»,-ասաց Բոստանջյանը։
Նրա խոսքով` եթե վերահսկողության, ստանդարտների պահպանման ինստիտուտներն աշխատեն, նման խնդիրներ չեն առաջանա։
Հետևությունը մեկն է` նախևառաջ հարակից օղակները պետք է պարտաճանաչ ու խիստ վերահսկողության ներքո կատարեն իրենց աշխատանքը։
