ԵՐԵՎԱՆ, 2 փետրվարի — Sputnik. Այսօր, կառավարության նիստից հետո լրագրողներին մոտեցած Մարդու իրավունքների պաշտպան Արման Թաթոյանն անդրադարձավ զինծառայողի գրքույկում ապրիլյան մարտերին մասնակցության նշումը ջնջելու միջադեպին։ «Երեք հիմնական հարց է բարձրացվում. առաջինը` զինգրքույկում համապատասխան գրառում չանելը, երկրորդը` զինգրքույկում գրառում անելը և ջնջելը և երրորդ` զինգրքույկում գրառում անելն ու անվավեր ճանաչելը»,-նշեց օմբուդսմենը։
Ըստ ՄԻՊ-ի` հարցը բարդանում է, որովհետև պետք է նաև հաշվի առնել զինծառայողը մարտական հերթապահության է եղել, թե մասնակցել է մարտական գործողություններին։ Այստեղ նաև օրենսդրական որոշակի խնդիրներ էլ կան։ «Ամեն դեպքում, քանի որ պաշտոնական ընթացակարգը պահանջում է սկզբում պարզաբանում պահանջել, հետո նոր գնահատական տալ, ապա, ղեկավարվելով դրանով, ես անմիջապես որոշում եմ կայացրել քննարկում սկսելու մասին, և զինծառայողներին ու նրանց ծնողներին ընդունելուց, քննարկելուց հետո, նոր գործին ընթացք եմ տվել»,-ասաց Թաթոյանը։
ՄԻՊ-ի պնդմամբ, անգամ եթե անփութություն է, ապա դա կատարած անձիք պիտի ենթարկվեն պատասխանատվության։
Ինչպես արդեն տեղեկացրել էինք` զորացրված զինծառայողներից ոմանց զինգրքույկներում սպիտակ ներկով ջնջել են ապրիլյան գործողություններին մասնակցելու հատվածը։ ԼՂՀ ՊՆ այս թեմայով պարզաբանման մեջ նշել էր, որ զորացրված զինծառայողների զինգրքույկներում արված, իսկ այնուհետև անվավեր ճանաչված գրառումները բացառապես պայմանավորված է տվյալ զորամասի համապատասխան պաշտոնատար անձի անփութության հետևանքով թույլ տրված վրիպումով:
