ԵՐԵՎԱՆ, 1 փետրվարի — Sputnik. «ՅուՏէյր» ընկերության ինքնաթիռների չվերթերի անվտանգությանը սպառնացող միջադեպ չի եղել։ Այս մասին Sputnik Արմենիային ասացին ընկերության մամուլի ծառայությունից։
«Այսօրվա դրությամբ չի եղել այնպիսի միջադեպ, որը կարող էր սպառնալ մեր չվերթերի անվտանգությանը։ Թռիչքներն իրականացվում են ըստ չվացուցակի»,- հայտնեցին մամուլի ծառայությունից։
Քաղաքացիական ավիացիայի գլխավոր վարչության մամուլի քարտուղար Սաթենիկ Հովհաննիսյանն այս առնչությամբ հաղորդագրություն է տարածել։
«Մամուլում տարածված այն տեղեկությունը, թե այսօր՝ փետրվարի 1-ին, «UTair» ավիաընկերությանը պատկանող «Բոինգ-737» ինքնաթիռը «Շերեմետևո» օդանավակայանից չի կարողացել իրականացնել Մոսկվա-Երևան չվերթը՝ ինքնաթիռի հետևի հատվածի կոտրված փականների անսարքության պատճառով, չի համապատասխանում իրականությանը: «UTair» ավիաընկերությունը «Շերեմետևո» օդանավակայանից Մոսկվա-Երևան չվերթեր չի իրականացնում, թռիչքներն իրականացվում են «Վնուկովո» օդանավակայանից»,- նշված է հաղորդագրության մեջ:
Հովհաննիսյանը նշում է նաև, որ փետրվարի 1-ին «UTair» ավիաընկերության UT 837 համարի ինքնաթիռը «Վնուկովո» օդանավակայանից Մոսկվա-Երևան չվերթը ժամը 11.10-ի փոխարեն իրականացրել է 11.36-ին և Երևան է հասել 13.58-ին՝ 14.00-ի փոխարեն:
«Որևէ միջադեպ չի արձանագրվել չվերթի ժամանակ», ընդգծել է ՔԱԳՎ մամուլի քարտուղարը։
