ԵՐԵՎԱՆ, 1 փետրվարի – Sputnik. Կառավարությունը վաղվա նիստում կքննարկի Չինաստանի Ժողովրդական Հանրապետությունում Հայաստանի Հանրապետության առևտրական կցորդի հաստիք ստեղծելու մասին որոշման նախագիծը:
Նոր պաշտոնը ենթադրում է լրացուցիչ 41.8 մլն դրամի ծախս ՀՀ 2017թ-ի բյուջեի համար: Ըստ նախագծի` հենց այսքան է հատկացվել ընթացիկ տարում ՉԺՀ-ում ՀՀ առևտրական կցորդի համար:
Այլ կերպ ասած, Պեկինում ՀՀ դիվանագիտական կորպուսում ևս մեկ պաշտոնյա ունենալու հաճույքը Հայաստանի հարկատուների գրպանին ամսական կարժենա ավելի քան 4 մլն դրամ:
Նշենք, որ «Հայաստանի Հանրապետության առևտրական կցորդների և առևտրական ներկայացուցչությունների կանոնադրությունը հաստատելու մասին» 2004թ-ին ընդունված կառավարության որոշմամբ, առևտրային կցորդը ստանում է դիվանագիտական ներկայացուցչության խորհրդականին հավասար աշխատավարձ և ծառայության հետ կապված ծախսերի փոխհատուցում, նրան տրամադրվում է հավելավճար՝ բնակարանի վարձակալության, գրասենյակային, կապի, տրանսպորտի և այլ ծախսերի համար:
Հիշեցնենք, որ 2015 թվականին ՀՀ նախագահի` Չինաստան կատարած պետական այցի ընթացքում պայմանավորվածություններ էին ձեռք բերվել ընդլայնել և ամրապնդել հայ-չինական փոխշահավետ առևտրատնտեսական համագործակցությունը և բարենպաստ պայմաններ ստեղծել ապրանքների, ծառայությունների, տեխնոլոգիաների և կապիտալի ներմուծման համար։
Առևտրաշրջանառությունը Չինաստանի և Հայաստանի միջև 2015 թվականին կազմել է 330 մլն ԱՄՆ դոլար, ինչը 13.9 %-ով ավել է 2014թ-ի նույն ցուցանիշից:
