ԵՐԵՎԱՆ, 1 փետրվարի — Sputnik. Երևանի Նարկոլոգիական հանրապետական կենտրոնում բուժվող հիվանդին հաջողվեց իր վրա հրավիրել լրագրողների ուշադրությունը։ Սա զարմացրեց հաստատության աշխատակիցներին։
Դեպքի վայր ժամանած լրագրողները սպասում էին տեսնել հիվանդանոցի շենքի առջև բողոքի ակցիա անցկացնող մարդկանց, որոնք պահանջելու էին պետության կողմից տրամադրվող ամենօրյա սննդից չզրկել հիվանդներին։ Դրա փոխարեն նրանք ականատես դարձան «գեներալ» կնոջ բողոքի ակցիայի անցկացմանը։ Հենց այսպես են նրան կոչում կլինիկայում։
Ապշած բժիշկներն ու բուժքույրերը չէին հասկանում, թե ինչն է պատճառը, որ կենտրոնի բակում այսքան լրագրողներ են հավաքվել։ Սակայն ստիպված եղան նրանց ուղեկցել բողոքի ձայն բարձրացրած հիվանդի մոտ։
Ինչպես լրագրողներին ասաց բողոքի ակցիայի միակ նախաձեռնողն ու մասնակիցը` Արևիկը, նրանց հայտարարել են, որ հաջորդ ամսվանից հիվանդանոցը իրենց ամենօրյա սննդով չի ապահովելու։
«Մի քանի օր առաջ մեզ ասացին, որ փետրվարի 1-ից մեզ չեն կերակրելու։ Ինչպես ուզում եք, այնպես էլ տակից դուրս եկեք։ Իսկ մենք ի՞նչ անենք, ինձ մի քիչ սնունդ բերում են, սակայն դա բավարար չէ», — ասաց նա։
Չարենցավանում բնակվող կինն արդեն 12-րդ օրն է, ինչ բուժվում է ալկոհոլիզմի դեմ։ Նախկինում նա սննդակարգի վերաբերյալ որևէ պահանջ չի ունեցել։
Կենտրոնի բժիշկներից մեկի` Կարինե Ամյանի խոսքով, որոշ հիվանդների հետ աշխատելը դժվար է, սակայն Արևիկի հետ մինչ օրս խնդիր չի առաջացել։ Ինչ վերաբերում է բարձրացված հարցին, ապա հիվանդանոցը մտադիր չէ հիվանդներին զրկել սննդից։
Նա ավելացրեց, որ հարազատները, հատկապես` դուստրը, հաճախ են այցելում Արևիկին, և նա սննդի հետ կապված որևէ խնդիր չունի։
Մյուս հիվանդներն իրենց ամենօրյա սննդից զրկելու մասին ոչինչ չեն լսել։ Իրենց տրվող սննդից էլ գոհ են։
Իրավիճակը պարզաբանել է նաև Նարկոլոգիական կենտրոնի տնօրեն Պետրոս Սեմերջյանը։ Նրա խոսքով` պետությունն ու Առողջապահության նախարարության իրավասության տակ գտնվող հիվանդանոցը, մտադիր չեն հրաժարվել սննդի տրամադրումից։
Սակայն, պարզվեց, որ կենտրոնը գտնվում է սննդի մատակարարման պայմանագրի վերակնքման գործընթացում։ Սեմերջյանի վարկածով` կինը, հավանաբար, որոշակի խոսակցություններ է լսել, որ նախկին մատակարարի հետ պայմանագրի ժամկետն ավարտվում է, և սխալ մեկնաբանել այդ խոսակցությունները։
Բացի այդ, հաջողվել է պարզել, որ փետրվարի 1-ին առավոտյան հիվանդներն առանց նախաճաշի են մնացել։ Դիսպանսերի ղեկավարը բացատրեց, որ դա տեղի է ունեցել տեխնիկական խնդիրների պատճառով, քանի որ այժմ սնունդն առաքում է ժամանակավոր մատակարարը, որը հիվանդանոցն ապահովելու է մինչև հիմնական գործընկեր կազմակերպության պայմանագրի հաստատումը։
Սակայն կենտրոնի տնօրենը հավաստիացրեց, որ հետագայում նաև նախաճաշը, ճաշն ու ընթրիքը ժամանակին կտրամադրվեն։
«Սնունդ մենք ստանում ենք օրական երեք անգամ։ Մեկ ամսվա կամ մեկօրյա պաշար չունենք։ Սնունդը ստացվում է այդ պահի հիվանդների քանակով», — ասաց Սեմերջյանը։
Նախկին պայմանագրի համաձայն` օրական մեկ հիվանդի հաշվարկով հիվանդանոցը ծախսում է 1950 դրամ, որը պայմանագրի վերակնքումից հետո կկազմի 1800 դրամ։
