ԵՐԵՎԱՆ, 1 փետրվարի – Sputnik. ՀՀ կառավարությունը պատրաստվում է վաճառել Թանկարժեք մետաղների և թանկարժեք քարերի պետական գանձարանի պահուստների հերթական խմբաքանակը: Խոսքն այս անգամ 102 կգ 793 գրամ արհեստական աճեցված մարգարիտի մասին է:
Մարգարիտի պահուստները վաճառելու մասին որոշման նախագիծը վաղը կներկայացվի կառավարության դատին: Նախագծի հեղինակ ֆինանսների նախարարությունը վաճառքի անհրաժեշտությունը հիմնավորում է պետական պահուստների կառավարումն արդյունավետ դարձնելու և պետբյուջեում համապատասխան եկամուտներ ապահովելու անհրաժեշտությամբ:
Նշվում է նաև, որ մարգարիտի պահպանումն անարդյունավետ և աննպատակահարմար է, քանի որ այն տարիների ընթացքում ենթարկվում է քայքայման:
Որոշման նախագծի համաձայն` մարգարիտի վաճառքը կիրականացվի հրապարակային աճուրդով:
Ի դեպ, մարգարիտի պահուստները վաճառելու փորձ կառավարությունն արդեն ձեռնարկել է 2012 և 2014թթ-ին, բայց վաճառքը չի կայացել՝ միջազգային շուկայում գների նվազման պատճառով:
