ԵՐԵՎԱՆ, 1 փետրվարի — Sputnik, Մարիա Շելուդյակովա. 2016 թվականին ռուս զբոսաշրջիկների համար հետխորհրդային տարածքի ամենապահանջված զբոսաշրջային ուղղությունների ցանկում են Վրաստանը, Հայաստանը, Մոլդովան և Ուզբեկստանը։ Այս մասին հայտնել է Ռուսաստանի տուրօպերատորների ասոցիացիայի գործադիր տնօրեն Մայա Լոմիձեն։ Միայնակ ճանապարհորդողներն առավել հաճախ ընտրել են հենց այս երկրները։
Վերջին տարիների ընթացքում հետխորհրդային տարածքում զգալիորեն փոխվել է ռուսական զբոսաշրջության աշխարհագրությունը ։ Մինչև 2016 թվականը առաջատար են եղել նախկին խորհրդային հանրապետություններից միայն երկուսը` Բելառուսն ու Ուկրաինան, իսկ մյուս երկրները «պասիվ վիճակում են եղել»։
«Առաջարկներ եղել են, սակայն ուղղությունները պահանջված չեն եղել, իսկ այսօր ռուսաստանցիները սկսել են ավելի շատ հետաքրքրվել Վրաստանով, Հայաստանով, Մոլդովայով և Ուզբեկստանով, հիմնականում` առանց տուրօպերատորների օգնությանը դիմելու, քանի որ այդ դեպքում ճանապարհորդությունը թանկ է լինում», — ասել է Լոմիձեն։
Տուրօպերատորները սկսել են հանգստի ավելի շատ տարբերակներ առաջարկել նախկին ԽՍՀՄ երկրներում, սակայն ավիատոմսերի բարձր արժեքը դեռ թույլ չի տալիս հավելյալ չվերթեր իրականացնել։ Բոլոր այդ երկրներին միայն մի բան է միավորում` ավիատոմսերի բարձր արժեքը։
Մոսկվա-Տաշքենդ-Մոսկվա ավիատոմսի միջին գինը մոտավորապես 400 դոլար է ։ Մոսկվայից Թբիլիսի և հակառակ ուղղությամբ ավիաչվերթի մոտավոր արժեքը կազմում է 160 դոլար։ Երևան և հակառակ ուղղությամբ տոմսերի արժեքը 135 դոլար է, Քիշնև-Մոսկվա ավիաչվերթի գինը` նույնպես 130 դոլար։
«2017 թվականի հունվարին տուրօպերատորներից մեկը միանգամից մի քանի տեղ է վերցրել, և, բնականաբար, տոմսի արժեքն ավելի ցածր է եղել։ Զբոսաշրջիկներին ուղարկում էին Գուդաուրի (Վրաստան) լեռնադահուկային զբոսավայր, և ուղեգրերը մեծ պահանջարկ ունեին։ Փորձարկումը դրական արդյունք տվեց, — ասել է ասոցիացիայի տնօրենը։ — Հավանաբար հաջորդ տարիներին նման ծրագրեր կիրականացվեն Հայաստանում և Ադրբեջանում, քանի որ այդ երկրների հետաքրքրությունը մեծ է ռուսական շուկայի նկատմամբ»։
Լոմիձեն նաև առաջարկել է օգտագործել Իսրայելի փորձը. ամբողջ անցյալ տարվա ընթացքում զբոսաշրջիկների հոսքի մեծացման համար երկիրը 45 եվրոյի փոխհատուցում էր վճարում ավիաընկերություններին և տուրօպերատորներին Էյլաթում վայրէջք կատարած յուրաքանչյուր ռուսաստանցու համար։ Ծրագիրը մեծ թվով զբոսաշրջիկների գրավեց, և այն ամենայն հավանականությամբ կշարունակվի նաև 2017 թվականին։
Բացի այդ, փորձագետը ներկայացրել է Ռուսաստանում Ադրբեջանի ներկայացուցչության աշխատանքի օրինակը։ Նրա խոսքով` 2016 թվականին ադրբեջանցիները բավական ակտիվ են աշխատել ՌԴ-ում` Ադրբեջանում հանգիստը կազմակերպելու առավելությունները ներկայացնող ճանաչողական տուրեր ու ցուցահանդեսներ անցկացնելով գործարար ոլորտի ներկայացուցիչների համար։ «Եվ այս ամենն ազդել է պահանջարկի վրա», — նշել է Լոմիձեն։
Պետք է հասկանալ, որ նախկին ԽՍՀՄ երկրների շուկայի տարողունակությունը փոքր է։ Ավելին` ակնհայտ է, որ զբոսաշրջիկներն ավելի շուտ կցանկանան հանգստանալ ծովափնյա վայրերում, քան մեկնել, օրինակ, Հայաստան, թեկուզ և նրանց հետաքրքիր, էկզոտիկ էքսկուրսիոն ծրագիր ներկայացվի։
«Վրաստանում ամռանը հիմնականում պահանջարկ ունեն ծովափնյա հանգստավայրերը, և այնտեղ բավական դժվար է տեղ գտնել, այդ մասին պետք է հոգալ նախապես։ Հայաստանում նույնպես հարմար է հանգստանալ ամառային սեզոնին։ Ադրբեջանում կա և՛ ծովափ, և՛ բուժիչ ցեխեր, և՛ էքսկուրսիաներ, բայց ամռանը շատ շոգ է։ Յուրաքանչյուր երկիր իր առավելություններն ունի», — եզրափակել է նա։
