Լաուրա Սարգսյան, Sputnik.
«Armenia» ավիաընկերության Երևան-Բեյրութ կանոնավոր չվերթը կգործարկվի ապրիլի 3-ից: Թռիչքը Երևանից կիրականացվի շաբաթական երկու անգամ: Ժամանակացույցի վերաբերյալ արդեն պայմանավորվածություն կա «Զվարթնոց» օդանավակայանի հետ:
«Կարող եմ հպարտությամբ ասել՝ իմ ներդրումն ունեմ այս նախագծում, որը կարևոր է մեզ` լիբանանահայերիս համար: Սա ոչ միայն կնպաստի երկու երկրների միջև զբոսաշրջության զարգացմանը, այլև կազատի մեզ տարանցիկ չվերթերի հետ կապված անհարմարություններից», — Sputnik Արմենիայի թղթակցի հետ զրույցում ասաց Կիտանյանը:
Նրա խոսքով` Լիբանանի հայերը երկար են սպասել այս իրադարձությանը: Այժմ պատմական հայրենիք գալը շատ ավելի կհեշտանա:
Ավիաընկերությունը ևս մեկ անակնկալ է մատուցել` ուղևորները կարող են Բեյրութ մեկնել ամենաէժան գնով և իրենց հետ տանել 30 կգ ուղեբեռ և 10 կգ ձեռքի ուղեբեռ:
Կիտանյանը խոստովանեց, որ կարճ ժամանակահատվածում են կարողացել կյանքի կոչել կանոնավոր ուղիղ ավիափոխադրումների գաղափարը: Գործը հեշտացրել է այն փաստը, որ երկրների միջև վիզային ռեժիմ չկա:
Մարդահամարի վերջին տվյալով` միայն Բեյրութում 120 հազար հայ է ապրում: Ամեն տարի Լիբանանից մոտավորապես 20 հազար մարդ է այցելում Հայաստան:
Ավիաընկերությունն արդեն գրասենյակ ունի Բեյրութում և պատրաստ է իրականացնել ավիաչվերթերը: Նախագիծն իրականացվում է տուրիստական ընկերություններից մեկի հետ համատեղ: «Armenia»-ն այս փուլում կանոնավոր չվերթեր ունի դեպի Վորոնեժ և Մինվոդի, նաև չարտերային չվերթեր է իրականացնում:
«Արմենիայի» ավիապարկն ունի երկու ինքնաթիռ` Boeing 737-500 և Boeing 737-700։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանը ազգային ավիափոխադրողից զրկվեց 2013 թվականին` «Արմավիա» ընկերության սնանկացումից հետո: Հայաստանի ավիաշուկայում հայտնվեց Air Armenia ընկերությունը, որը, սակայն, 2014 թվականի հոկտեմբերին սնանկացավ ու դադարեցրեց ավիափոխադրումները:
