ԵՐԵՎԱՆ, 1 փետրվարի — Sputnik. Տեխնիկական անվտանգության ազգային կենտրոնը հայտարարություն է տարածել ձմեռային էքստրիմի սիրահարների համար, որոնք իրենց ժամանցն անցկացնում են Ծաղկաձորում:
«Հայտնում ենք, որ Ծաղկաձորում շահագործվող ճոպանուղին (արտադրական վտանգավոր օբյեկտ) շահագործվում է տեխնիկական անվտանգության օրենսդրության պահանջների կոպտագույն խախտումներով, որոնք կարող են տեխնածին վթարի և արտադրական դժբախտ դեպքի պատճառ հանդիսանալ»,- նշված է հայտարարության մեջ:
«Տեխնիկական անվտանգության ապահովման պետական կարգավորման մասին» ՀՀ օրենքի և ոլորտը կարգավորող այլ իրավական ակտերի համաձայն ՀՀ տարածքում շահագործվող յուրաքանչյուր արտադրական վտանգավոր օբյեկտ (ԱՎՕ) պարտավոր է գրանցվել ԱՎՕ-ների ռեեստրում և տարեկան առնվազն մեկ անգամ ենթարկվել տեխնիկական անվտանգության փորձաքննության։
«Այդ մասին բազմիցս տեղեկացվել է Ծաղկաձորի ճոպանուղի շահագործողին, սակայն 2006 թվականից մինչ օրս այդ հորդորները անտեսվում են»,- նշել են կենտրոնից` ընդգծելով, որ տեղի ունեցած դեպքերի վերլուծությունը թույլ է տալիս պնդել, որ արտադրական վտանգավոր օբյեկտներում դժբախտ դեպքերը հիմնականում տեղի են ունենում հենց փորձաքննություն չիրականացնելու պատճառով:
Ծաղկաձորի անբաժանելի մասը կազմող ճոպանուղու 5 կայանները կառուցվել են 2004-2007 թթ-ին։
