ԵՐԵՎԱՆ, 31 հունվարի — Sputnik. Հայկական արմատներ ունեցող ուկրաինացի երգիչ Արսեն Միրզոյանը համր ֆիլմի մեծ դերասան Չարլի Չապլինի աղջկան նվիրված «Ջերալդինա» երգով կպայքարի Ուկրաինան «Եվրատեսիլ 2017»-ին ներկայացնելու իրավունքի համար, հայտնում է ICTV Փաստեր պորտալը։
Արսեն Միրզոյանն արդեն մասնակցել է ազգային ընտրությանը և հաղթել է կիսաեզրափակիչ փուլում։ Բացի Միրզոյանից, Ուկրաինան ներկայացնելու իրավունքի համար կպայքարի մրցույթի ևս 23 հավակնորդ։
Ազգային ընտրական փուլի ժամանակ Արսեն Միրզոյանը կկատարի «Ջերալդինա» կոմպոզիցիան։ Երգի ստեղծման համար հիմք է հանդիսացել սուրբծննդյան նամակը, որում Չարլի Չապլինը դիմում է իր դուստր Ջերալդինային։
Ուկրաինացի երգիչ և երգերի հեղինակ Արսեն Միրզոյանը ծնվել է Զապորոժիեում։ 20 տարեկանում Արսենին հրավիրել են «բակային» ռոք-խմբերից մեկի կազմ, այնուհետև` «Տոտեմ» խումբ։ Ներկա պահին 38-ամյա Արսեն Միրզոյանն արդեն 4 ալբոմ և 6 տեսահոլովակ ունի։
