ԵՐԵՎԱՆ, 31 հունվարի — Sputnik. Բլոգեր Ալեքսանդր Լապշինի հետ կապված իրավիճակը խայտառակություն է։ Նախարարի նշեց, որ ինքը չգիտի, թե ով և ինչ կարող է վաստակել Լապշինի գործից, բայց վստահ է, որ դա ոչ մեկի հեղինակության վրա դրական չի ազդի։ «Խայտառակություն է»,- ասել է Հայաստանի ԱԳՆ ղեկավար Էդվարդ Նալբանդյանը` պատասխանելով Sputnik Արմենիայի թղթակցի հարցին։ Նախարարի խոսքով` կատարվածը չի կարող նախադեպ դառնալ կամ լինել խոչընդոտ Լեռնային Ղարաբաղի Հանրապետություն այցելելու համար: «Ղարաբաղ գնացել են, գնում են և էլի կգնան: Ադրբեջանցիների կազմած սև ցուցակում մոտ 500 մարդ կա` պետական, քաղաքական, հասարակական գործիչներ, մշակույթի հեղինակավոր, համաշխարհային համբավ ունեցող դեմքեր: Որևէ մեկը կարո՞ղ է Ադրբեջանի հետ համագործակցել այդ հարցով կամ հանձնել իրենց` իհարկե ոչ», — նշեց Նալբանդյանը։
Նալբանդյանը ուշադրություն հրավիրեց այն փաստի վրա, որ վերջին շրջանում, չնայած Ադրբեջանի վայնասուններին, զբոսաշրջիկները շարունակում են այցելել Լեռնային Ղարաբաղ: «Ղարաբաղն իսկապես դարձել է ձգող ուժ: Որքան խոչընդոտում են, այնքան գովազդում են, և բոլորը ցանկանում են գնալ, տեսնել»,¬- նշեց արտգործնախարարը։
Նալբանդյանի խոսքով` Ադրբեջանի նյարդերը տեղի են տալիս, այդ պատճառով էլ նման իրավիճակների է ստեղծում: Դա միայն վնաս է հասցնում Ադրբեջանի հեղինակությանը և կհասցնի բոլոր նրանց, ովքեր կփորձեն այսպիսի հարցերում համագործակցել Ադրբեջանի հետ։
ՌԴ և Իսրայելի քաղաքացի Ալեքսանդր Լապշինը, որը բնակվում է Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում: 2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով:
