ԵՐԵՎԱՆ, 31 հունվարի — Sputnik. Հայաստանի արտգործնախարար Էդվարդ Նալբանդյանը հաստատեց, որ եռանախագահներից առաջարկ է ստացել Ադրբեջանի արտգործնախարար էլմար Մամեդյարովի հետ հանդիպելու մասին։
«Եռանախագահներն առաջարկել են Հայաստանի արտգործնախարարությանը հանդիպել Մյունխենի անվտանգության համաժողովի նախաշեմին: Առաջարկ է հնչել նաև հանդիպում կազմակերպել Հայաստանի և Ադրբեջանի արտգործնախարարների միջև: Մենք, իհարկե, երբևէ չենք հրաժարվում որևէ հանդիպումից: Բայց ինչ վերաբերում է Ադրբեջանի նախարարի հետ հանդիպմանը, այս պահին չեմ կարող հաստատել», — նշեց Նալբանդյանը երեքշաբթի կայացած մամուլի ասուլիսում։
Նախարարի խոսքով` հայտնի չէ, թե այս անգամ ինչ խաղեր կարող է տալ Ադրբեջանը:
«Պայմանավորվում ենք մի բան, սակայն վերջին րոպեին նրանք ձևացնում են, որ ինչ-ինչ պատճառներով չեն կարող, անգամ մեղադրում են, որ հայկական կողմն է հրաժարվում հանդիպումից: Ասացին, որ Համբուրգում ընդհանրապես հանդիպում չի կայացել, թեպետ հանդիպումը եղել էր եռանախագահների ներկայությամբ և արտգործնախարարների մասնակցությամբ», — ասաց Նալբանդյանը։
