ԵՐԵՎԱՆ, 31 հունվարի — Sputnik. Հայաստանի արտգործնախարար Էդվարդ Նալբանդյանի կարծիքով` ժամանակն է սթափեցնել Ադրբեջանին, որը կորցրել է իրականության զգացումը։
«Ադրբեջանն անում է այն, ինչ կատարել է բազմաթիվ անգամներ` խանգարում է համանախագահների (ԵԱՀԿ Մինսկի խմբի) և Հայաստանի գործողություններին` ուղղված ղարաբաղյան հակամարտության խաղաղ կարգավորմանը։ Ադրբեջանի հարցականի տակ է դրել Վիեննայում և Սանկտ Պետերբուրգում ձեռք բերված համաձայնությունները», — չորեքշաբթի կայացած ասուլիսի ժամանակ ասաց նախարարը։
Նալբանդյանն ավելացրել է, որ Մինսկի խմբի միջնորդները մշտապես ստիպված են կոչ անել դադարեցնել կրակը, ստեղծել միջադեպերի ստեղծման մեխանիզմներ և ընդլայնել ԵԱՀԿ գործող նախագահի հատուկ ներկայացուցչի գրասենյակի լիազորությունները։
Նա նշեց, որ անկախ նրանից, թե որ մակարդակում է որոշում ընդունվել 2016թ-ի նոյեմբերի վերջին տեղի ունեցած դիվերսիայի մասին, այն բխել է ադրբեջանական կողմից։
«Շատ տարբերակներ կան, թե ով է դիվերսիա իրականացնելու հրաման տվել, սակայն ոչ ոք չի կասկածում, որ Բաքուն կարող էր նման հրաման տալ` անկախ նրանից, թե որ մակարդակում է դա եղել։ Հնարավոր է` նույնիսկ տեղի հրամանատարների մակարդակում», — ասաց Նալբանդյանը։ Նրա խոսքով` դա վկայում է Ադրբեջանի զինված ուժերում տիրող «բեդլամի» մասին։
«Այսինքն, ինչ-որ հրամանատարներ թքած ունեն իրենց ղեկավարության վրա և կարող են այնպիսի գործողությունների, արկածախնդրության գնալ, որը կարող է ոչ միայն սրել, այլև այլ բացասական զարգացումների բերել», — ընդգծեց արտգործնախարարը:
Անդրադառնալով այն հնարավոր տարբերակին, թե կատարվածը խելքը կորցրած դիվերսանտների ձեռքի գործն էր` Նալբանդյանն ասաց. «Իհարկե, լսելով Ադրբեջանի ղեկավարության գեբելսյան հռետորաբանությունը, պատահական չէ, որ Ադրբեջանի հասարակության մեջ այսպիսի երևույթներ կարող են լինել, որոնք խոսում են ամբոխային խելագարվածության մասին: Հակառակ դեպքում, ինչպե՞ս կարող է լինել, որ հանրային կարծիքի հարցումները, որոնք անցկացվել են հունվարին հենց Ադրբեջանում, ասում են այն մասին, որ Ադրբեջանի հասարակության 92 տոկոսն արտահայտվում է ուժի գործադրման և ռազմական ճանապարհով հարցի լուծման օգտին»։
