ԵՐԵՎԱՆ, 30 հունվարի — Sputnik. «Գազպրոմի» և Վրաստանի պայմանագրի մանրամասները կարող են հրապարակվել միայն երկկողմ համաձայնության դեպքում։ Այս մասին հայտնում է ՌԻԱ Նովոստիին` հղում անելով Վրաստանի փոխվարչապետ, էներգետիկայի նախարար Կախա Կալաձեին։
Ավելի վաղ վրացական կողմը որոշել էր ընդունել «Գազպրոմ էքսպորտի» առաջարկը և ռուսական գազը Հայաստան տեղափոխելու դիմաց ոչ թե գազ ստանալ, այլ` գումար։ Բացի այդ, պայմանավորվածության համաձայն`Վրաստանը անհրաժեշտության դեպքում Ռուսաստանից գազ է ստանալու ոչ թե 215 դոլարով (հազար խմ-ի դիմաց), այլ` 185 դոլարով։ Այս համաձայնագիրը չի գոհացրել վրացական ընդդիմությանը, և 80 ՀԿ-ներ դիմել են կառավարությանն ու էներգետիկայի նախարարությանը` պահանջելով հրապարակել այդ պայմանագիրը։
«Վրացական կողմը չի կարող ինքնուրույն որոշել, թե համաձայնագրի որ կետերը կարելի է հրապարակել, որը` ոչ։ Դա պետք է լինի երկկող համաձայնության հիման վրա։ Ես հայտնել եմ, որ մենք աշխատում ենք այդ ուղղությամբ։ Ընդհանուր առմամբ, մենք շատ նամակներ ենք ստանում Socar-ի, «Շահդենիզի» հետ համաձայնագրերը հրապարակելու խնդրանքով։ Կարծում եմ, որ դա ճիշտ չէ, քանի որ բոլոր զարգացած երկրներում նման համաձայնագրերը կոմերցիոն գաղտնիք են համարվում», — լրագրողներին հայտնել է Կալաձեն։
Նախարարն ավելացրել է, որ չի պատրաստվում այդ թեմայով խոսել խորհրդարանում, քանի որ ինքն արդեն լիարժեք պատասխաններ է տվել «Գազպրոմի» հետ համաձայնագրի հետ առնչվող բոլոր հարցերի վերաբերյալ։
Վրաստանը 2007 թվականից ի վեր Ռուսաստանից գազ չի գնում։ Գազի հիմնական ներկրողն Ադրբեջանն է, որը 2016 թվականի մարտի սկզբին համաձայնել էր ավելացնել մատակարարման ծավալները։ Մինչ օրս Վրաստանը ստանում էր Հայաստան մատակարարվող ռուսական գազի ամբողջ ծավալի 10%-ը` որպես տարանցման վճար։ Վրաստանի և «Գազպրոմ էքսպորտի» պայմանագրի ժամկետն ավարտվել է հունվարի 1-ին։ Կողմերը երկար ժամանակ բանակցություններ էին վարում, քանի որ «Գազպրոմը» պնդում էր գազի տարանցման վճարն իրականացնել գումարով, ոչ գազով, ինչպես առաջարկում էր Վրաստանը։
