ԵՐԵՎԱՆ, 29 հունվարի — Sputnik. Հայկական տնտեսության դոլարացման մակարդակը տարվա ընթացքում 65%-ից նվազել է մինչև 60%: Այս մասին գրված է Զարգացման Եվրասիական բանկի գլխավոր տնտեսագետի խմբի նախապատրաստած եռամսյակային մակրոտնտեսական հաշվետվության մեջ:
Արտասահմանյան արժույթով ռեզիդենտների դեպոզիտների տեսակարար կշռի հաշվարկով դեպոզիտների ընդհանուր ծավալում 2016 թվականի նոյեմբերի վերջին դոլարացման մակարդակը կազմել է 60,1% (2015 թվականի նոյեմբերի վերջին՝ 65%):
Բացի այդ, անցած տարվա տվյալներով՝ եվրասիական տարածաշրջանի երկրները փոխարժեքի կայունություն են ցուցադրել, իսկ մի շարք դեպքերում էլ՝ ազգային արժույթի զգալի ամրապնդում, անկախ նրանից, որ 2016 թվականը Եվրասիական զարգացման բանկի երկրների համար հեշտ չի սկսել:
Անցյալ տարվա առանցքային ձեռքբերումներիցն էր արժեզրկման զգալի նվազումը (ԵԶԲ-ի երկրներում այն 2016 թվականի վերջին հասել էր պատմական նվազագույն 5,8%-ի, 2015 թվականի 12,8% համեմատ): Ընդ որում, արժեզրկման նվազումը հավանաբար կշարունակվի նաև 2017 թվականին:
ԵԶԲ-ի մակրոտնտեսական հաշվետվությունը հրապարակվում է եռամսյակը մեկ անգամ, այն թողարկում է Եվրասիական զարգացման բանկի գլխավոր տնտեսագետի խումբը: Այնտեղ վերլուծվում և քննարկվում են ԵԶԲ մասնակից երկրների միտումներն ու խնդիրները, ինչպես նաև տնտեսական զարգացման կանխատեսումները:
