Օրեր առաջ ՀՀԿ խորհդրի նիստում ՀՀ նախագահ Սերժ Սարգսյանը զավեշտալի էր համարել խոսակցություններն այն մասին, թե ՀՀԿ-ից արտահոսք կա: Նա այս կապակցությամբ ասել էր. «Գիտեք՝ մայր գետերը, առաջընթաց են ապահովում իրենց հոսքի ողջ երկայնքով, կյանք են տալիս, հաց են տալիս, ջուր են տալիս, և այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են: Սա՛ է բնության օրենքը, և որևէ մեկը մեզնից չի կարող հակադրվել բնության օրենքներին, մենք կարող ենք փորձել կառավարել, կարգավորել, բայց, ըստ էության, այսպես է լինելու»
Լրագրողները Գալուստ Սահակյանին հարցրել են՝ ինչ նկատի ուներ ՀՀ նախագահը:
Գալուստ Սահակյանը մեկնաբանել է այսպես. «Եթե ինչ-որ ճանապարհով գնում ենք, պիտի մինչև վերջ գնանք: Եթե փորձում ենք այդ ճանապարհից շեղվել և հետ չգալ, բնական է՝ նաև կորցնում ենք: Դա մեր կյանքի փորձն է, որն ընդունվում է նաեւ քաղաքականության մեջ»:
Լրագրողները հարցրին՝ հնարավո՞ր է Հովիկ Աբրահամյանի հետ այնպես վարվեք, ինչպես Գագիկ Ծառուկայնի հետ:
«Եթե ինչ-որ խնդիր առաջանա, որը կվնասի մեր պետության հետագա գործընթացներին, բնականաբար, ամեն ինչ հնարավոր է: Բայց այս պահին, կարծում եմ, նման խնդիրներ չեն կարող առաջանալ, որովհետեւ ընտրական պրոցես է, և քաղաքական թիմերը համոզված են, որ ընտրություններից հետո որևւէ մեկը չի կարող մյուսին ինչ-որ բանում մեղադրել»,- ասաց նա:
