ԵՐԵՎԱՆ, 27 հունվարի — Sputnik. Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանի արտգործնախարար Սերգեյ Լավրովը կշարունակի ղարաբաղյան հիմնախնդրի հետ կապված հանդիպումները։
«Իհարկե, կլինեն նոր հանդիպումներ։ Առայժմ հստակ ժամանակացույցը չի ձևավորվել, բայց հանդիպումներ կլինեն։ Այդ թեման ռուսական արտաքին քաղաքականության գերակա ուղղություններից է, ուստի տարբեր ձևաչափերով հանդիպումները կշարունակվեն», — ասել է Զախարովան` պատասխանելով Հայաստանի և Ադրբեջանի արտգործնախարարներ Էդուարդ Նալբանդյանի և Էլմար Մամեդյարովի հետ Լավրովի վերջին հանդիպումների մասին հարցին։
Նա նշել է, որ Լավորվի հանդիպումների մասին տեղեկատվությունը` նախատեսված լայն հանրության համար, հրապարակվել է մամուլի ծառայության մեկնաբանություններում։
«Ինչպես հասկանում եք, թեմաները շատ զգայուն են, բանակցությունները կառուցողական են եղել և պարունակել են տարբեր քննարկումներ` ուղղված խնդրի կարգավորմանը։ Այն ամենն, ինչ կարելի էր ասել, ասվել է այդ հանդիպումների արդյունքում», — հայտարարել է Զախարովան։
Հայաստանի և Ռուսաստանի ԱԳՆ ղեկավարներ Էդվարդ Նալբանդյանը և Սերգեյ Լավրովը հանդիպել են հունվարի 19-ին` քննարկելով մի շարք հարցեր, ներառյալ ղարաբաղյան հակամարտության կարգավորումը, պայմանավորվածությունների իրագործման հարցերը, որոնք ձեռք են բերվել Վիեննայում և Սանկտ Պետերբուրգում կայացած գագաթաժողովների ընթացքում։
