ԵՐԵՎԱՆ, 26 հունվարի — Sputnik. ՀՀԿ-ն չի բացառում, որ ԱԺ ընտրությունների օրը կարող է փոխվել, եթե բոլոր քաղաքական ուժերը գան միասնական պայմանավորվածության։ Այս մասին այսօր լրագրողներին հայտնեց ՀՀԿ խոսնակ Էդուարդ Շարմազանովը։
«Մենք կարծում ենք, որ ապրիլի 2-ը ազգային համախմբման, մեր հերոս տղաների հիշատակի օրն է, և եթե բոլոր քաղաքական դերակատարները ընտրությունների օրը հետաձգելու շուրջ քաղաքական պայմանավորվածության գան, ապա ՀՀԿ-ն խոչընդոտ չի տեսնում»,- ասաց նա։
Շարմազանովը նաև փոխանցեց կուսակցության խորհրդի նիստում Սերժ Սարգսյանի ելույթի հիմնական թեզերը։ Նրա խոսքով՝ ՀՀԿ նախագահը մասնավորապես անդրադարձել է առաջիկա ԱԺ ընտրություններին՝ ասելով.
«ՀՀԿ-ն վերահաստատում է, որ մեզ համար կենսական կարևորություն ունի առաջիկա խորհրդարանական ընտրությունների ժողովրդավարական բնույթը։ Մենք ամեն ինչ անելու ենք, որ ՀՀ ԱԺ ընտրությունները լինեն ԸՕ-ին համապատասխան և համապատասխանեն ժողովրդավարության միջազգային չափանիշներին»,- Շարմազանովի փոխանցմամբ ասել է Սերժ Սարգսյանը։
ՀՀ ԱԺ ընտրությունները նախատեսված են 2017 թ-ի ապրիլի 2-ին, որոշ քաղաքական ուժեր ՀՀԿ-ին կոչ էին արել տեղափոխել ընտրությունների օրը՝ պատճառաբանելով, որ այդ օրը լրանում է ապրիլյան պատերազմի տարելիցը և իրավական ու բարոյական առումներով սխալ է ընտրությունները նշանակել ապրիլի 2-ին:
