ԵՐԵՎԱՆ, 26 հունվարի — Sputnik. Այսօր Երևանում լրագրողների համար ցուցադրվեց ռեժիսոր Մհեր Մկրտչյանի՝ մեծ աղմուկ բարձրացրած «Կյանք ու կռիվ» ֆիլմի երկրորդ մասը:
«Կյանք ու կռիվ 2» ֆիլմը պատմում է ճակատագրի բերումով Ղարաբաղյան պատերազմի ականատես դարձած երիտասարդների կյանքի մասին, ներկայացնում է ֆիլմի հերոսների կյանքը 25 տարի անց, երբ պատերազմը կրկին նրանց կյանք է ներխուժում: Սակայն ապրիլյան պատերազմը սյուժեի միայն մի մասն է կազմում:
«Ես երբեք չեմ ասել, որ ֆիլմն ապրիլյան պատերազմի մասին է, ֆիլմը հերոսների մասին է», — մամուլի ասուլիսի ժամանակ ասաց ռեժիսոր և սցենարիստ Մհեր Մկրտչյանը:
Պրոդյուսեր Կարեն Ղազարյանն իր հերթին հաստատեց, որ ֆիլմը Ղարաբաղյան պատերազմի մասին չէ, այլ այն մարդկանց, որոնք ապրել են այդ ժամանակաշրջանում:
Պատերազմի պատճառով նրանց ճակատագրերն այլ կերպ են դասավորվել, ոչ այնպես, ինչպես նրանք էին ուզում և պատկերացնում…
«Երբ մենք նկարահանում էինք ֆիլմի առաջին մասը, պետք է Ղարաբաղ մեկնեինք: Սակայն այդ ժամանակ մենք իմացանք, որ պատերազմ է սկսվել, և նկարահանումները ստիպված եղանք հետաձգել: Հենց այդ ժամանակ ռեժիսոր Մհեր Մկրտչյանի մոտ միտք հղացավ նկարահանել ֆիլմի շարունակությունը: Մենք միանգամից ամեն ինչ հասկացանք և հավանություն տվեցինք նրա գաղափարին: Պարզապես 25 տարի անց մենք կրկին պատերազմական դրության մեջ հայտնվեցինք, և շատերի ճակատագիրը կտրուկ փոխվեց պատերազմի պատճառով», — ասաց Ղազարյանը:
Նրա խոսքով` ի սկզբանե ֆիլմը նախատեսված էր հայ հանդիսատեսի համար, սակայն չի բացառվում, որ ֆիլմը ցուցադրվի նաև միջազգային փառատոներում: Sputnik Արմենիայի հարցին, թե արդյոք նկարահանումների ժամանակ մտավախություն չկա՞ր, որ այդքան սիրված առաջին մասից հետո հանդիսատեսը պարզապես չի կարողանա ճիշտ ընկալել երկրորդ մասը, Մկրտչյանը պատասխանեց:
«Անկեղծ ասած, մտավախություն ու անհանգստություն հիմա էլ կա»:
«Կյանքը ու կռիվ 2» ֆիլմը մեծ էկրաններին կհայտնվի հունվարի 27-ին: Ֆիլմի սցենարի հիման վրա համանուն վեպ է գրվելու, որի հեղինակը կլինի հայտնի դրամատուրգ և սցենարիստ Գուրգեն Խանջյանը: Ֆիլմի երկրորդ մասի դերասանական կազմն ամբողջովին փոխվել է: Գլխավոր դերերում հանդես են գալիս Բաբկեն Չոբանյանը, Շանթ Հովհաննիսյանը, Անի Ղազարյանը, Նարինե Գրիգորյանը, Արծրուն Չոբանյանը, Գագիկ Մադոյանը, Դիանա Մալենկոն:
