Լաուրա Սարգսյան, Sputnik.
Վլադիմիր Վիսոցկու կյանքում մի քանի հայեր են եղել, որոնք մեծ ազդեցություն են ունեցել նրա ճակատագրի ու արվեստի վրա։ Նրան մեծացրել է խորթ մայրը` Եվգենիա Լիխալատովան (Մարտիրոսովա), որը հայկական արմատներ է ունեցել։ Նա հարազատ որդու պես սիրում էր Վիսոցկուն։
«Վոլոդյայի և խորթ մոր ջերմ հարաբերությունների մասին գրել է Վիսոցկու կինը` Մարինա Վլադին, իր «Ընդհատված թռիչք» գրքում։ Վիսոցկին միշտ դրական է խոսել իր Ժենեչկայի (այդպես էր նրան դիմում) մասին»,- Sputnik Արմենիայի թղթակցին ասաց Վիսոցկու հետ աշխատած թարգմանիչ Լևոն Բլբուլյանը։
Նա շատ է սիրել հայերին, այդ սիրո հիմքը դրվել է դեռ մանկության տարիներին։ Վիսոցկու մտերիմ ընկերներից մեկը եղել է Հայկական ԽՍՀ ժողովրդական արտիստ, հայտնի դերասան Սուրեն Քոչարյանի որդին` Լևոն Քոչարյանը։
Դեռ երիտասարդ տարիքում երկու ընկերները` Վիսոցկին և Քոչարյանը, բնակարան են վարձել խորհրդային կինոռեժիսոր, դերասան Վասիլի Շուկշինի հետ։ Հիանալի եռյակի բնակարանը միշտ մարդաշատ է եղել, յուրաքանչյուր երեկո նրանց այցելել են ընկերները, ծանոթները, կազմակերպել տնային համերգներ։
Մի անգամ, նման երեկոներից մեկի ժամանակ, դեռևս անհայտ Վիսոցկին ընկերների համար կատարել է իր ստեղծագործություններից մեկը։ Քոչարյանը բոլորից թաքուն ձայնագրել է Վիսոցկուն։ ԽՍՀՄ-ում մեծ իրարանցում առաջացրած ձայնագրությունը ավելի ուշ բացահայտել է Վիսոցկուն աշխարհի համար։
Վլադիմիր Վիսոցկու կյանքում մեծ դեր է խաղացել նաև ԽՍՀՄ ժողովրդական արտիստ Լեոնիդ Ենգիբարյանը, որի վաղաժամ մահը Վիսոցկին ծանր է տարել։ Թախծոտ ծաղրածու Ենգիբարյանի մասին Վիսոցկին մի անգամ ասել է. «Իմ սիրելի արտիստների շարքում կա մեկը, որի հանդեպ քնքշությունն անսահման է։ Նրան կոչում են Ենգիբարով»։
Վլադիմիրն ընկերություն է արել մարդ-լեգենդ, աշխարհահռչակ կինոռեժիսոր Սերգեյ Փարաջանովի հետ։
«Մարինա Վլադին և Վոլոդյան հարսանեկան ճանապարհորդությամբ մեկնել Թբիլիսի։ Փարաջանովը նրանց համար անակնկալ և նվեր էր պատրաստել», — պատմեց Բլբուլյանը։
Փարաջանովի մոտ ընթրիքից հետո, հյուրանոցի այն համարում, որտեղ կանգ են առել նորապսակները, երիտասարդ զույգին սպասում էր Փարաջանովի` մրգերից հավաքված խճանկարը։
Վիսոցկին ընդամենը մեկ անգամ է եղել Հայաստանում, սակայն մինչև հիմա այդ այցի մասին լեգենդներ են պատմում։ Լուրեր են պտտվում, որ նա կնքվել է հայ առաքելական եկեղեցիներից մեկում։Վիսոցկին և նրա ընկերը` թարգմանիչ Դավիթ Կարապետյանը Հայաստանում վթարի են ենթարկվել և հրաշքով են փրկվել։
Վիսոցկու վրա մեծ տպավորություն է գործել լեռնային Հայաստանը` իր տեսարժան վայրերով և պատմական հուշարձաններով։
Չնայած որ Վիսոցկին այդ տարիներին արգելված էր Խորհրդային Միությունում, բայց Դավիթի օգնությամբ նա համերգ է տվել Անվտանգության պետական կոմիտեի դահլիճներից մեկում։
Անվանի խորհրդային բանաստեղծ, հեղինակային երգիչ Վլադիմիր Վիսոցկին այսօր կդառնար 79 տարեկան։
