ԵՐԵՎԱՆ, 25 հունվարի — Sputnik. Երեկ ռազմական հոսպիտալ տեղափոխված պաշտպանության բանակի 2 վիրավորների վիճակն այս պահին ծայրահեղ ծանր է: Այսօր լրագրողների հետ հանդիպմանը հայտնեց ՀՀ Զինված ուժերի ռազմաբժշկական վարչության պետ, գնդապետ Կամավոր Խաչատրյանը:
Նրա խոսքով` բժիշկները ստիպած են եղել հեռացնել պայմանագրային զինծառայող Ալեքսեյ Ավանեսյանի ոտքը, ով ոսկրային ծանր վիրավորում էր ստացել ծնկային հոդի շրջանում: Նման որոշում է կայացվել միայն այն բանից հետո, երբ ոտքը վիրահատելու և այն պահպանելու ջանքերն օգուտ չեն տվել:
Իսկ գլխուղեղի վիրավորում ստացած ՊԲ զինծառայող Գուրգեն Սարգսյանն այս պահին դեռ գտնվում է կոմայի մեջ, միացված է արհեստական շնչառական ապարատին:
Հակառակորդի կողմից հրադադարի խախտման հետևանքով վիրավորումների դեպքերը, Կամավոր Խաչատրյանի խոսքով, վերջին երեք տարիներին կտրուկ աճել են:
ՙ2016թ-ին, պայմանավորված ապրիլյան պատերազմով, դեպքերը միանշանակ աճել են: Միայն ապրիլյան օրերին մենք ունեցել ենք 134 վիրավոր: Իսկ ապրիլյան պատերազմին հաջորդած օրերին հակառակորդը դիվերսիոն- հետախուզական աշխատանքները շարունակել է և ինտենսիվ կերպով փորձել վնասել մեր զինված ուժերին: Դրանով պայմանավորված էլ վիրավորների թվաքանակն աճել է՚,- ասաց Խաչատրյանը:
Ապրիլյան պատերազմի ընթացքում ծանր վիրավորում ստացած զինծառայողներից երեքն առ այսօր դեռ շարունակում են վերականգնողական բուժում ստանալ:
Իսկ տարածված տեսակետը, թե Հայաստանում մնալով, վիրավոր զինծառայողները պատշաճ բուժօգնություն, այդ թվում՝ պրոթեզավորում չեն ստանում, Կամավոր Խաչատրյանը չի ընդունում՝ միաժամանակ հիշեցնելով, որ կառավարության 2016թ-ի որոշմամբ, ծառայության ժամանակ վիրավորված ցանկացած զինծառայողն, ում բուժումը հնարավոր չէ իրականացնել ՀՀ-ում, կարող է պետական աջակցությամբ բուժումը շարունակել արտասահմանյան ցանկացած առաջավոր կլինիկայում:
