ԵՐԵՎԱՆ, 24 հունվարի — Sputnik, Մարիա Շելուդյակովա. Հայաստանի և Ռուսաստանի միջև ապրանքաշրջանառությունը, չնայած բարդ իրադրությանը և էներգակիրների ցածր գներին, շարունակում է կայուն մնալ, իսկ արտահանումը Ռուսաստան Հայաստանի` ԵՏՄ-ին անդամակցելու շնորհիվ աճել է 70 տոկոսով, հայտարարել է Ռուսաստանի վարչապետ Դմիտրի Մեդվեդևը հայ գործընկեր Կարեն Կարապետյանի հետ բանակցությունների ընթացքում։
Երկու երկրների կառավարությունների ղեկավարների հանդիպումը տեղի է ունենում Մոսկվայում։ Բանակցությունների ընթացքում գործընկերները քննարկել են տնտեսական օրակարգը, ինչպես նաև մի շարք այլ հարցեր, այդ թվում` մարդասիրական։ Մեդվեդևը նշել է, որ կողմերը քննարկել են մի շարք փաստաթղթեր` երկու երկրների համագործակցության վերաբերյալ։
«Այսօրվա հանդիպումը հարթակ է շատ հարցերում պարզություն մտցնելու համար։ Մեր պատվիրակությունը ժամանել է դրական և գործնական տրամադրվածությամբ։ Ռուսական կապիտալը լայնորեն ներկայացված է Հայաստանի տնտեսությունում, բայց պետք չէ բավարարվել դրանով։ Ներկա պահին երկրում բարեփոխումներ են անցկացվում ներդրողների համար բարենպաստ պայմաններ ստեղծելու համար։ Մենք ժամանել ենք կոնկրետ առաջարկներով», — հայտարարել է վարչապետ Կարեն Կարապետյանը բանակցությունների ընթացքում։
Սա Կարապետյանի առաջին այցն է Ռուսաստան վարչապետի պաշտոնում։ Օրակարգում ներառված են ռուս-հայկական համագործակցությանը վերաբերող արդիական հարցեր` նվիրված առևտրատնտեսական, էներգետիկ, տրանսպորտային, մարդասիրական ոլորտներին։ Կարապետյանը Մոսկվա է ժամանել ՌԴ վարչապետի հրավերով։
Ռուսաստանը Հայաստանում օտարերկրյա գլխավոր ներդրողն է։ ՀՀ-ում ռուսական ներդրումների ծավալը 2.7 միլիարդ դոլար է կազմում։ Ռուսաստանը Հայաստանի արտաքին տնտեսական առաջատար գործընկերն է։ Հունվար-հոկտեմբեր ժամանակահատվածում ապրանքաշրջանառությունը կազմել է 1.033 միլիարդ դոլար, ընդ որում` Հայաստանից արտահանումն ավելացել է 2.1 անգամ և կազմել 314,2 միլիոն դոլար։ Հայաստանը հիմնականում պարենամթերք ու գյուղմթերք արտահանում է Ռուսաստան։
Русская версия
