ԵՐԵՎԱՆ, 24 հունվարի — Sputnik. Հայաստան ռուսական գազի առաքումների ծավալը 2016թ-ին, նախորդ տարվա համեմատ, կրճատվել է` 1,92 մլրդ խմ-ից հասնելով 1,87 մլրդ խմ-ի։ Նավթագազային տեղեկատվության գործակալությունը հայտնում է, որ այդ մասին նշված է Հայաստանի և Ռուսաստանի վարչապետներ Կարեն Կարապետյանի և Դմիտրի Մեդվեդևի հանդիպմանը նվիրված նյութերում։
«Հայաստանի գազամատակարարումը լիովին կախված է Ռուսաստանից գազի առաքումներից, որոնք իրականացվում են Վրաստանի տարածքով։ Գազի առաքումները 2016թ-ին կազմել են 1,87 մլրդ խորանարդ մետր (2015թ-ին` 1,92 մլրդ խմ)», — ասվում է նյութերում։ Կառավարության նյութերի համաձայն, երկու երկրների փոխգործակցության մյուս խոշոր ոլորտների շարքում գազային շուկայում համագործակցությունն է։
«Գազպրոմն» ընդհանուր առմամբ 500 միլիոն դոլար է ուղղել Հայաստանում գազաէներգետիկ նախագծերի ֆինանսավորման համար, որոնց շարքում են նաև Հրազդանի ՋԷԿ-ի հինգերորդ էներգաբլոկն ու Իրան-Հայաստան գազամուղը։
