ԵՐԵՎԱՆ, 23 հունվարի– Sputnik. Տարածքային զարգացման նախարարությունում մշակվում է և առաջիկայում կառավարության հաստատմանը կներկայացվի 2017-25թթ մարզերի զարգացման ռազմավարությունը: Դրա համար ուսումնասիրվել են ՀՀ բոլոր մարզերի խնդիրները, զարգացման հնարավորություններն ու հեռանկարները: Այս մասին Sputnik Արմենիա ռադիոկայանի եթերում ասաց տարածքային զարգացման նախարարի տեղակալ Արթուր Խաչատրյանը: Մարզերի զարգացման առաջին ու ամենակարևոր խնդիրը, փոխնախարարի խոսքով, տեղերում աշխատատեղերի ստեղծումն է:
Ռազմավարական փաստաթուղթը քննարկվելու է նաև մարզի բնակիչների հետ, որից հետո կբաշխվեն նաև առանձին գերատեսչությունների անելիքները:
«Փորձում ենք հասկանալ, թե տվյալ մարզում որոնք են առաջնահերթությունները և կոնկրետ ինչ ծրագիր պետք է իրականացվի: Ապա պետք է դիտարկել, թե ինչ ֆինանսական ներդրումներ կարող են արվել տվյալ ծրագրի համար, ինչ աջակցություն կարող է ցույց տալ պատասխանատու պետական մարմինը»,- ասաց փոխնախարարը:
Խորհրդային տարիներին մարզերում գործող երբեմնի հզոր գործարանների վերաբերյալ հարցին Արթուր Խաչատրյանը պատասխանեց. «Դա ցավոտ հարց է: Ժամանակին կար սոցիալիստական ճամբար, որը սպառում էր այդ գործարանների արտադրանքը: Այսօր այդ շուկան այլևս չկա, աշխարհն առաջ է գնացել, տեխնոլոգիաները զարգացել են: Երբեմնի հզոր գործարանները տասնամյակներ չն գործել: Նույնիսկ եթե ինչ-որ հրաշքով այդ գործարանները 1988թ-ից փոխադրենք 2017 ու ասենք՝ դե սկսեք աշխատել, արդյոք դրանք կտա՞ն այն արտադրանքը, որն աշխարհում մրցունակ կլինի»:
Այդուհանդերձ, կառավարության ներկայացուցիչը նշում է, որ եթե կա գործարան, որը հնարավոր է վերագործարկել, մոդեռնացնել, գտնել սպառման շուկա, ապա այն կվերագործարկվի:
Օրինակ՝ Վանաձորի քիմիական գործարանի վերագործարկումը փոխնախարարն անհնար է համարում: ՙԴա այսօր ուղղակի տարածք է, որը ճիշտ կլինի այլ նպատակով օգտագործել՚,- ասաց նա՝ հավելելով, որ Վանաձորի մեկ այլ երբեմնի հզոր խորհրդային գործարանի տարածքում այսօր հայ-չինական ընկերություն է գործում, որի շրջանակում տրակտորներ են արտադրվում:
Մարզային տնտեսության սայլը տեղից շարժելու համար տարածքային զարգացման նախարարի տեղակալ Արթուր Խաչատրյանի համոզմամբ, գաղափարները պետք է դառնան ծրագրեր ու չմնան թղթի վրա:
