ԵՐԵՎԱՆ, 21 հունվարի — Sputnik. Սպիտակ տան նոր վարչակազմի անցումային գործընթացի համար պատասխանատվություն է կրելու ազգությամբ հայ Քեն Նախիգյանը, նրան այդ պաշտոնին նշանակել է ԱՄՆ նոր փոխնախագահ Մայք Փենսը, հայտնում է The Wall Street Journal-ը:
Նախիգյանն այդ պաշտոնում կփոխարինի Ռիկ Դիրբորնին, որն, իր հերթին, կզբաղեցնի վարչակազմի ղեկավարի տեղակալի պաշտոնը: Թրամփի նախընտրական արշավի ընթացքում Նախիգյանը գլխավորում էր ռազմավարական պլանավորման և աջակցության կենտրոնը, իսկ այժմ նա աջակցելու է Սպիտակ տան նոր վարչակազմի թեկնածուներին՝ ԱՄՆ-ի Սենատում լսումների ժամանակ:
«Ընտրություններից հետո Նախիգյանի դերը մեծացավ: Նրա պարտականությունների մեջ մտան ոչ միայն նորընտիր նախագահին աջակցելը, այլև մեր վարչակազմի պաշտնոտար անձանց համար լսումներ կազմակերպելը: Անցումային գործընթացը գտնվում է Նախիգյանի վստահելի ձեռքերում», — նշել է Դիրբորնը` փոխանցելով լիազորությունները Քեն Նախիգյանին:
Նախիգյանը հավաստիացրել է, որ Թրամփի, ԱՄՆ փոխնախագահի և Դիրբորնի վստահությունը մեծ պատիվ է նրա համար: Հունվարի 20-ին Դոնալդ Թրամփն ու փոխնախագահ Մայք Փենսը մասնակցեցին երդման հանդիսավոր արարողությանը, որից հետո ստանձնեցին պաշտոնները:
