ԵՐԵՎԱՆ, 20 հունվարի — Sputnik. Մոսկվայի դատախազությունը «մրցավազքի» սիրահար, սկանդալային Մառա Բաղդասարյանին վարորդական իրավունքից զրկելու հայց է ներկայացրել Մոսկվայի Սավելովյան դատարան։ Այս մասին հայտնում է ՌԻԱ Նովոստին` հղում անելով դատարանի մամուլի քարտուղար Կոնստանտին Տիմոշենկոյին։
Մոսկվայի դատախազության պաշտոնական կայքում նշված է, որ Մառա Բաղդասարյանին վարորդական իրավունքից զրկելու մասին պահանջը պայմանավորված է այն հանգամանքով, որ տրանսպորտային միջոցներ վարելու համար բժշկական հակացուցումների մասին տեղեկությունները հաստատվել են։
Ավելի վաղ Բաղդասարյանի փաստաբանը նշել էր, որ նրա առողջական վիճակը վատացել է: Նա դատարանին հայտնել էր, որ բժշկական հիմնավորմամբ նա չի կարող կատարել մաքրողի աշխատանքը (Բաղդասարյանը պետք է աշխատեր 595 ժամ):
Մառա Բաղդասարյանը 2016 թվականի մայիսին հայտնի է դարձել որպես Gelandewagen-ով սկանդալային «մրցավազքի» մասնակից ։ Նրան ձերբակալել են 2016 թվականի նոյեմբերին Մոսկվայի Լենինի անվան պողոտայում։
Ոստիկանության աշխատակիցները վարչական տուգանք են նշանակել սխալ կայանած ավտոմեքենայի համար, սակայն փաստաթղթերը ստուգելու ընթացքում տեսուչները հայտնաբերել են, որ աղջիկը չի վճարել 16 տուգանք։
