ԵՐԵՎԱՆ, 20 հունվարի — Sputnik. 1909 թվականին Կեսարիայում(այժմյան Կայսերի) ծնված Քնար Եմենիջյանը իր մահկանացուն կնքել է կանադական Մոնրեալում, 2017 թ.-ի հունվարի 19-ին։ Փետրվարին նա կդառնար 108 տարեկան:
Քնար Եմենիջյանի ընտանիքին հաջողվել է փրկվել Ցեղասպանությունից: «Կանադայի ռադիո» ռադիոկայանին մոր հուշերն է փոխանցել որդին` Հովսեփը։ «Մորս հայրը զինվորական է եղել: Նրանց ընտանիքին փրկել է թուրք ծառայակիցը` թաքցնելով ֆերմայում: Մի քանի օր նրանք ամբարում են ապրել: Երկար ժամանակ ուտելու բան գրեթե չեն ունեցել: Իսկ պապս, որը բանակում է եղել, հիվանդացել է տիֆով: Տիֆը փրկություն է դարձել նրա համար: Ասել են՝ առանց այն էլ կմեռնի ու չեն սպանել, պարզապես հեռացրել են բանակից: Նա փնտրել ու գտել է իր ընտանիքին»:
Քնար Եմենիջյանի ընտանիքը վերադարձել է իրենց հրդեհված տուն: Այնտեղ, 10 տարի շարունակ, ապրել են ուրիշի անվան տակ, ստիպված են եղել որպես մահմեդականներ ներկայանալ: Որոշ ժամանակ անց տեղափոխվել են Եգիպտոս, որտեղ վերադարձրել են իրենց իրական անունները:
1956 թվականին, Սուեզի ճգնաժամից հետո, Քնար Եմենիջյանի ընտանիքը Կանադա է տեղափոխվել:
Sputnik Արմենիայի հետ զրույցում Կանադայում ՀՀ դեսպանության աշխատակից Սասուն Հովհաննիսյանն ասաց, որ Ցեղասպանության 100-րդ տարելիցի միջոցառումներին տիկին Քնարն անձամբ մասնակցում էր։ Չնայած պատկառելի տարիքին` Քնար Եմենիջյանը հիշում ու պատմում էր ջարդի ու գաղթի ճամփի բոլոր դժոխային մանրամասները։
