Լև Ռիժկով, Sputnik.
«Ռոսիա սեգոդնյա» ՄՏԳ-ում անցկացված քննարկման թեման եղել է «Դոնալդ Թրամփի երդմնակալության արարողությունը. ռուս-ամերիկյան հարաբերությունների օրակարգը»։ Փորձագետներն ու վերլուծաբանները կարծիքներ են հայտնել քաղաքական երկու հսկաների հարաբերությունների վերաբերյալ։
Իմպիչմենտ չի սպառնում
Քաղաքագետ, Մոսկվայի Քարնեգի կենտրոնի տնօրեն, միջազգային հարաբերությունների հարցերով Ռուսական խորհրդի անդամ Դմիտրի Տրենինը ուշադիր հետևել է ԱՄՆ-ի նախընտրական քարոզարշավին։ Եվ այն, ինչ տեսել է, բացահայտում է եղել նրա համար։ «Ամերիկյան քաղաքական խավն այնքան էլ վստահ չէր սեփական ուժերի հարցում։ Հենց միայն այն միտքը, որ հաքերային հարձակումները կարող են խաթարել ամենասուրբ բանը, որը կա ԱՄՆ-ում` ժողովրդավարությունը, արդեն հեղափոխական է։
Դա վկայում է, որ այդ գաղափարներն առաջադրող մարդիկ այդքան էլ վստահ չեն իրենց ուժերի մեջ։ Նշանակում է նաև` նրանք վստահ չեն իրենց ընտրողի հարցում», — ասել է քաղաքագետը։
Տրենինը համոզված է, որ արտաքին քաղաքականության ոլորտում պետք չէ մեծ փոփոխությունների սպասել։
«Արևելյան Եվրոպայի երկրներն ու անգամ Ուկրաինան չպետք է անհանգստանան, որովհետև Ռուսաստանին ձեռնտու է այն իրավիճակը, երբ Ուկրաինան Ռուսաստանի և ՆԱՏՕ-ի միջև արտաքին քաղաքական բուֆերի դեր է կատարում։ Այդ վիճակը ձեռնտու է Ռուսաստանին, որովհետև ֆինանսապես չի կարող «ձգել» Ուկրաինային», — ասել է Տրենինը։ Նրա կարծիքով` Թրամփը չի հրաժարվիՕբամայի գլոբալ նախագծերից, իսկ ազգային նախագծերը կմղի առաջ։
«Ես Թրամփին դիտարկում եմ որպես ամերիկացի ազգայնական։ Այս համատեքստում ազգայնականը բացասական բառ չէ։ Ինձ համար նա այն մարդկանցից է, որոնց շարքն է դասվում Վլադիմիր Պուտինը` Ռուսաստանում, Սի Ցզինպինը` Չինաստանում, Ռեջեփ Թայիփ Էրդողանը` Թուրքիայում»,- ընդգծել է Տրենինը։ Փորձագետի կարծիքով` ամերիկյան քաղաքականության վեկտորն ամբողջությամբ պարզ կլինի մեկ տարի անց, երբ Եվրամիության կարևոր պետություններում ընտրություններ անցկացվեն։ Ամենայն հավանականությամբ, իմպիչմենտ տեղի չի ունենա։
«Երբ մարդը դեռ չի ստանձնել նախագահի պաշտոնը, իմպիչմենտի մասին խոսակցություններն անհասկանալի են։ Նախագահի իմպիչմենտը լուրջ ներքին ճգնաժամ է երկրի համար։ Մի բան, որը կարող է որոշ ժամանակով ապակայունացնել ԱՄՆ-ի ներքին իրավիճակը», — ասել է քաղաքագետը։
Գայլն ու գառը
Ռուսաստանի գիտությունների ակադեմիայի Ե. Պրիմակովի անվան համաշխարհային տնտեսության և միջազգային հարաբերությունների ինստիտուտի միջազգային անվտանգության կենտրոնի ղեկավար Ալեքսեյ Արբատովը կարծում է, որ ռուս-ամերիկյան հարաբերությունների սրընթաց բարելավում չի լինի։
«Վերջին շրջանում Թրամփին քննադատում են մի շարք անպատասխանատու արտահայտությունների համար։ Թրամփը հավանաբար որոշել է ցուցադրել, որ գայլ չէ, որ պատերազմող նախագահ չէ։ Ինչու՞ է նա դա կապել պատժամիջոցների հետ։ Դա ուղղակի երևակայության թռիչք էր, որը սահմաններ չի ճանաչում», — ասել է Արբատովը։
«Ինչպե՞ս կարելի է բնութագրել հանրապետականների և դեմոկրատների տարբերությունը։ Դեմոկրատներն ուզում են երջանկացնել ամբողջ աշխարհը և հանուն դրա պատրաստ են նույնիսկ զոհերի գնալ։ Հենց նման ծրագրով էր եկել Օբաման։ Իսկ հանրապետականներն ուզում են երջանկացնել ԱՄՆ-ն։ Նրանք վերջին հաշվով թքած ունեն աշխարհի վրա, բացառությամբ` Իսրայելի», — ասել է քաղաքագետը։
Ալեքսեյ Արբատովի կարծիքով` զիջումներ հնարավոր են այն ոլորտներում, որտեղ ԱՄՆ-ի հետ հակասություններ չկան ։
«Այնտեղ, որտեղ հակասություններ ծագեն, ԱՄՆ-ն կոշտ դիրքորոշում կզբաղեցնի։ Ընդ որում, կխոսի ուժի դիրքերից, բոլոր ոլորտներում կօգտագործի իր պաշարները և տնտեսական գերազանցությունը։ Որքան հիշում եմ, ԱՄՆ-ի ոչ մի նախագահի այդպես չեն պաշտպանել, ինչպես հիմա պաշտպանում են Թրամփին։ Անջելա Դևիսի ժամանակներից», — ասել է Արբատովը։
Փորձագետը համոզված է` Թրամփի քաղաքականությունն ԱՄՆ-ի միջազգային փոխազդեցության հաստատման ռազմավարություն չի լինի, այլ կլինի ԱՄՆ-ի շահերի պաշտպանության քաղաքականություն։
