ԵՐԵՎԱՆ, 20 հունվարի — Sputnik. Դոնալդ Թրամփն իր երդմնակալության ելույթի ժամանակ կոչ արեց գործի անցել՝ հայտարարելով, որ երկիրը վերականգնման կարիք ունի:
70-ամյա գործարարը ստանձնեց ԱՄՆ-ի նախագահի լիազորությունները՝ այս պաշտոնում փոխարինելով Բարաք Օբամային:
Երդմնակալության արարողության ժամանակ Թրամփը խոստացավ Ամերիկան դարձնել «ուժեղ, հպարտ, հարուստ և անվտանգ երկիր»: Ելույթի վերջում
Թրամփը կրկնեց իր նախընտրական քարոզարշավի գլխավոր կարգախոսը. «Միասին մենք Ամերիկան կրկին հզոր կդարձնենք»:
Թրամփի ելույթը տևեց 17 րոպե: Նա ամերիկյան ժողովրդին երախտագիտության խոսքեր ասաց՝ հայտարարելով, որ պատրաստվում է համատեղ ջանքերով «երկար տարիների կտրվածքով որոշել ԱՄՆ-ի և աշխարհի զարգացման ընթացքը»:
«Մենք՝ ամերիկացիներս, այսօր ձեռնամուխ ենք լինում մեր երկիրը վերականգնելու համազգային գործին», — ասաց նա:
Բարաքը և Միշելը հիասքանչ էին
Ժողովրդին շնորհակալություն հայտնելուց հետո Թրամփն անդրադարձավ Օբամային:
«Մենք շնորհակալ ենք նախագահ Օբամային և առաջին տիկին Միշել Օբամային հիանալի աշխատանքի և իշխանությունը հանձնելու ընթացքում ցուցաբերած աջակցության համար: Նրանք հիասքանչ էին», — ասաց Թրամփը:
Միաժամանակ նա ընդգծեց, որ երդմնակալության արարողությունը «հատուկ նշանակություն» ունի:
«Որովհետև մենք այսօր ոչ միայն հանձնում ենք իշխանությունը մի վարչակազմից մյուսին, մի կուսակցությունից մյուսին, այլև մենք իշխանությունը վերադարձնում ենք ամերիկյան ժողովրդին», — նշեց Թրամփը:
ԱՄՆ-ն չի պարտադրի իր կենսակերպը, բայց կպաշտպանի իր սահմանները
Թրամփը խոստացավ, որ ԱՄՆ-ն իր կենսակերպը չի պարտադրի այլ երկրներին՝ նրանց թողնելով սեփական շահերը պաշտպանելու իրավունքը:
«Մենք ուզում ենք, որ ամերիկյան կենսակերպն օրինակ ծառայի բոլորի համար»,- ասաց Թրամփը:
Նա անդրադարձավ նաև միջազգային ահաբեկչության դեմ պայքարին: «Մենք կուժեղացնենք հին դաշինքները և կստեղծենք նորերը, որպեսզի միավորենք քաղաքակիրթ աշխարհն արմատական իսլամական ահաբեկչության դեմ պայքարում, որը մենք ուզում ենք ջնջել աշխարհի երեսից», — ասաց ԱՄՆ նախագահը:
Միաժամանակ նա հայտարարեց, որ ԱՄՆ-ն տասնամյակներ շարունակ պաշտպանել է օտարների սահմանները՝ մոռանալով սեփական բանակի մասին:
«Շատ տասնամյակներ մենք հարստացրել ենք ուրիշի արդյունաբերությունն ամերիկյանի հաշվին, սուբսիդավորել այլ երկրների բանակները մեր զինվորականների հաշվին: Մենք պաշտպանել ենք օտարի սահմանները՝ հրաժարվելով պաշտպանել սեփականը»,- ասաց Թրամփը:
Նա ելույթն ավարտեց «մենք Ամերիկյան կրկին կհզորացնենք» արտահայտությամբ ու սեղմեց Բարաք Օբամայի ձեռքը:
