Լաուրա Սարգսյան, Sputnik.
«Ակոս» թերթի գլխավոր խմբագիր Հրանտ Դինքի սպանության օրվանից արդեն տասը տարի է անցել, և այսօր, հերթական անգամ, Ստամբուլում մի քանի հարյուր հասարակական և քաղաքական գործիչներ, հասարակ քաղաքացիներ, ընկերներ և ծանոթներ կհավաքվեն` հարգանքի տուրք մատուցելու Դինքին` «Հրանտ Դինքի ընկերների խումբ» կազմակերպության հովանու ներքո։
«Մենք կհավաքվենք «Ակոս» թերթի խմբագրության մոտ` հենց այն վայրում, որտեղ սպանվել է Դինքը։ Անկախ նրանից, որ այսօր Ստամբուլի փողոցներ դուրս գալը վտանգավոր է դարձել` հաճախակի դարձած ահաբեկչությունների պատճառով, այնուամենայնիվ, շատ մարդ կհավաքվի», — Sputnik Արմենիայի հետ զրույցում ասաց «Ակոս» թերթի հայկական տարբերակի խմբագիր Բագրատ Էստուկյանը։
Էստուկյան էլ կմիանա ակտիվիստներին, քանի որ Դինքը նրա համար հարազատ մարդ էր։ Նրանք ծանոթացել են անցյալ դարի 70-ականներին, մանկական ճամբարում, որտեղ Դինքը ճամբարի ջոկատավար էր, իսկ Բագրատը` նրա օգնականը։ Այն ժամանակ նրանք 20 տարեկան էին։
Էստուկյանը հիշում է, որ ինքը Դինքով հիացել է առաջին իսկ պահից, հիացել է նրա անսպառ էներգիայով, կամքի ուժով և խիզախությամբ։ Նա կարող էր տեղում փոխել աշխարհը։
«Մի անգամ Ստամբուլում փորձում էին փակել տեղի հայկական դպրոցներից մեկը։ «Ակոս» թերթի խմբագրությունը միացավ պայքարին, ես և Հրանտը բազմաթիվ ակտիվիստների թվում էինք», — հիշում է Էստուկյանը։
Համախոհների դպրոցը հաջողվեց փրկել, իսկ այդ դեպքը Էստուկյանը հիշելու է միշտ. վաղուց Դինքին նա այդքան երջանիկ չէր տեսել։
Հրանտ Դինքի կորուստը մեծ էր Թուրքիայի հայերի համար, բայց նրանք այսօր իրենց որբացած չեն զգում։ Նոր առաջնորդ է հայտնվել` վառ, խարիզմատիկ, խելացի և անվախ Կարո Փայլանը։ Թուրքիայի հայերը նրա մեջ Հրանտ Դինքի շարունակությունն են տեսնում։
«Կարո Փայլանը մեր հենքն է և Թուրքիայի հայերի հզոր առաջնորդը։ Նրա մեջ մենք տեսնում ենք Դինքի հետնորդին, սակայն մտահոգված ենք նրա անվտանգության համար», — խոստովանեց Էստուկյանը։
Փայլանը «Ազգայնական շարժում» խմբակցության անդամների հակակրանքն է վայելում` Հայոց ցեղասպանություն եզրույթը օգտագործելու պատճառով։
Դինքը սպանվել էր 2007 թվականի հունվարի 19-ին, 17-ամյա ազգայնամոլ Օգյուն Սամաստի կողմից, Ստամբուլում, իր թերթի խմբագրատան դիմաց։ Ոստիկանությունը Սամաստին ձերբակալեց հանցագործության հաջորդ օրը և 2011 թվականին 22 տարի և 10 ամիս ազատազրկման դատապարտեց։
Դինքի սպանությունը Թուրքիայում մեծ աղմուկ բարձրացրեց։ Նրա թաղումը բազմահազարանոց ցույցի վերածվեց, որին մասնակցեցին մի շարք երկրների և միջազգային կազմակերպությունների ներկայացուցիչներ։
