ԵՐԵՎԱՆ, 19 հունվարի — Sputnik. Հայաստանից արտահանումների ծավալն առաջիկա տարիներին կավելանա տարեկան 80-100 մլն ԱՄՆ դոլարով, ներդրումները կաճեն 350-400 մլն-ով: Այս ամենը հնարավոր կլինի իրականացնել Սյունիքի մարզում ազատ տնտեսական գոտու ստեղծման արդյունքում:
Իսկ առայժմ ծրագրի հեղինակները ակնկալում են շուրջ 28 մլն դոլարի ներդրումային ծրագրեր և սպասում են գործարարների առաջարկներին՝ դրանք քննարկելու համար:
ՙՀամոզված ենք, որ դա շահութաբեր բիզնես է կազմակերպչի համար, իսկ շահագործողների համար՝ զարգանալու լուրջ հնարավորություն՚,- ներկայացնելով ազատ տնտեսական գոտու գաղափարը՝ նշեց ՀՀ տնտեսական զարգացման և ներդրումների նախարարի տեղակալ Հովհաննես Ազիզյանը:
Իրան-Հայաստան ապրանքաշրջանառությունն 2016թ-ին կազմել է շուրջ 280 մլն ԱՄՆ դոլար, որում 70 մլն դոլարը ՀՀ-ից արտահանման ծավալն է, 210-ը՝ Իրանից ներմուծումը: Ընդ որում, Հայաստանից արտահանվող հիմնական ապրանքն էլեկտրաէներգիան է: Երկրորդ տեղում կենդանի ոչխարն ու ոչխարի միսն է:
ՙՈւնենք շոկոլադ, հրուշակեղեն, տարբեր այլ ապրանքներ, բայց արտահանման ամենամեծ պոտենցիալն, իհարկե, շշալցված հանքային ջուրն է: Մենք ակնկալում ենք, որ եթե իրանական կողմը բավականաչափ իջեցնի մաքսատուրքերը, արտահանման մեծ պոտենցիալ կունենան նաև ծխախոտը, դեղամիջոցները: Իրանական շուկան 80 մլն-անոց շուկա է: Այդտեղ ցանկացած ապրանք, եթե օրինական ընթացակարգերով ներմուծվի, հաստատ կվաճառվի՚,- ասաց փոխնախարարը:
Արտահանվող ապրանքների սակավությունը Հովհաննես Ազիզյանը մեկնաբանում է հիմնականում հայկական ապրանքների անհրաժեշտ սերտիֆիկացման և երկու երկրների միջև բանկային փոխանցումների բացակայության գործոնով՝ հույս հայտնելով, որ այդ խնդիրները ևս առաջիկայում կլուծվեն՝ խթանելով Հայաստանից ապրանքների արտահանումն Իրան:
Իսկ, որ հայկական արտադրության ապրանքների պահանջարկը հարևան երկրում կա, Հովհաննես Ազիզյանը չի կասկածում:
ՙԻրանական շուկայում հայկական ապրանքին ծանոթ են: Իրանցի զբոսաշրջիկները, որոնց թիվը տարեցտարի աճում է, գալով Հայաստան, ծանոթանում են մեր ապրանքին, և ցանկություն ունեն այդ ապրանքն իրենց շուկայում տեսնելու՚,- ասաց նա:
Հայ- իրանական սահմանին հարող տարածքում, Մեղրիի տարածաշրջանում, ազատ տնտեսական գոտու շահագործման ժամկետը փոխնախարարի խոսքով կարող է համընկնել ԵԱՏՄ-Իրան ազատ առևտրի համաձայնագրի կնքման ժամկետի հետ, ինչը նշանակում է, որ նորաստեղծ տնտեսական գոտին կարող է կապող օղակ դառնալ նաև Իրանի և ԵԱՏՄ անդամ երկրների միջև:
