ԵՐԵՎԱՆ, 19 հունվարի — Sputnik. ՀՀ փոխարտգործնախարար Շավարշ Քոչարյանը շեշտեց` ռոտացիոն կարգով այս տարի ՀԱՊԿ գլխավոր քարտուղարը պետք է լինի Հայաստանից, և այդ որոշումը կայացվել է։
«Նախորդ տարի արձանագրվել էր, որ ռոտացիան պետք է մտնի այս տարվա հունվարի 1-ից, և բնական է, որ պետք է լիներ Հայաստանի ներկայացուցիչը։ Երբ Հայաստանում տեղի ունեցավ ՀԱՊԿ-ի գագաթնաժողովը, չեղավ կոնսեսուս, որովհետև ժամանակ պահանջեցին այդ հարցին անդրադառնալու համար։ Վերջին հանդիպմանը չի եղել Բելառուսի նախագահը, ինչը հնարավորություն չի տվել որոշում կայացնել»,- ասաց նա։
Արդյունքում հունվարի 1-ից ոչ թե նոր գլխավոր քարտուղար կա, այլ` ժամանակավոր պաշտոնակատար։ Նա Նիկոլայ Բորդյուժայի տեղակալն է` Վալերի Սեմերիկովը։
«Մոտակա ժամանակ պետք է այդ հարցում հստակեցում մտցվի։ Հենց եղավ հավաքը, կոնսեսուսային որոշումը, Հայաստանը կնախագահի»,- ասաց Քոչարյանը։
Լրագրողների այն դիտարկմանը, որ, հրապարակումների համաձայն` խոչընդոտներ կան Ղազախստանի կողմից, Շավարշ Քոչարյանը միանշանակ պատասխան տվեց` Ղազախստանը երբեք չի խոչընդոտել։ Միակ խոչընդոտն առաջացել է Բելառուսի նախագահի բացակայությունից։
