ԵՐԵՎԱՆ, 18 հունվարի — Sputnik. Երևանում բազմաբնակարանային տների բարեկարգման և հաշմանդամների կենսագործունեության համար պայմանների բարելավման հարցերը գտնվելու են Երևանի քաղաքապետարանի ուշադրության կենտրոնում։ Այս մասին, ամփոփիչ մամուլի ասուլիսի ժամանակ, հայտնեց Երևանի քաղաքապետի առաջին տեղակալ Կամո Արեյանը։
«Մայրաքաղաքային ադմինիստրացիայի ամենակարևոր խնդիրը կմնա բազմաբնակարանային շենքերում աշխատանքների իրականացումը, անցյալ տարի, օրինակ, բազմաբնակարանային շենքերի 538000 քմ մակերեսի վրա տարվել են տարբեր աշխատանքներ», — ասաց նա։ Արեյանը նշեց, որ 2016 թվականին 57 շենքում վերանորոգվել է 138 վթարային պատշգամբ` դրանց փլուզումը կանխելու նպատակով։ Նա ավելացրեց, որ շատ կարևոր է Երևանի բնակիչների կենսական պայմանների կատարելագործման ծրագիրը, այդ թվում` հաշմանդամություն ունեցողների։
Փոխքաղաքապետը նշեց, որ 2013 թվականից Երևանի քաղաքապետի հրամանով գործարկվել է թեքահարթակների կառուցման ծրագիրը։ Այսպիսով, 2016 թվականին կառուցվել է 275 նոր թեքահարթակ, որոնցից 73-ը` նոր տեխնոլոգիայով. շարվել են կլոր սալիկներով` հատուկ տեսողության խնդիրներ ունեցող անձանց համար։
Արեյանը նաև հայտնեց, որ քաղաքի շինարարության և բարեկարգման աշխատանքների ծախսերը 2016 թվականին կազմել են 5 մլրդ դրամ (ավելի քան 10 մլն դոլար)։ Այս միջոցներից կանաչապատման համար ուղղվել է 1.5 մլրդ դրամ։ Ընդ որում, ջրամատակարարման ոլորտի համար ուղղվել է 1.5 մլրդ դրամ` «Երևան ջրմուղ»-ի անձնական միջոցների հաշվին (առանց հարկային ռեսուրսի)։
2016 թվականին նախատեսված ծրագրի համաձայն, 386 փողոցում և 1005 բակում ասֆալտապատվել է ընդհանուր 800 քմ մակերես։ Նա հայտնեց, որ նշված ժամանակահատվածում մայրաքաղաքի 3050 շենքերի շքամուտքերում և տանիքներում տարվել են վերանորոգման աշխատանքներ։ Ընդ որում, 12 շենքի թեք տանիքները 2016 թվականին ամբողջությամբ վերանորոգվել են։ Փոխքաղաքապետը ավելացրեց, որ 2017 թվականին պետբյուջեից 83 մլրդ դրամ կուղղվի (172 մլն դոլար) Երևանում բարեկարգման, շինարարական և վերանորոգման աշխատանքների կատարման համար։ Այս տարի կշարունակվեն նաև ավտոճանապարհների շինարարության, վերականգնման և վերանորոգման աշխատանքները։
