ԵՐԵՎԱՆ, 19 հունվարի — Sputnik. Սյունիքի մարզպետ Վահե Հակոբյանը Yerkir.am-ին ասել է` որպեսզի ավելի ճիշտ հնչի, լուծվել է Օրբելյանի պայմանագիրը: Ըստ մարզպետի` Կապանի ԲԿ-ի դեմ հարուցված է քրեական գործ, և առաջին ահազանգը դա է:
«20 օրվա ընթացքում Կապանի ԲԿ-ում արձանագրվել է 5 մահ, 4-ը երեխաներ են: Մարզպետարանում ստեղծվել է հանձնաժողով, որն ուսումնասիրել է բոլոր դեպքերը: Ի հայտ են եկել և' կազմակերպչական, և' բուժանձնակազմի հետ կապված խախտումներ»,- հայտնել է Հակոբյանը:
Մարզպետը նաև հայտնել է երեկոյան ԲԿ-ում տեղի ունեցած դեպքի մասին` ԲԿ-ի մեկ այլ բժշկի կողմից բռնաբարության փորձ է եղել հիվանդի նկատմամբ, և նշեց, որ զարմանալ պետք չէ, որ ԲԿ-ի տնօրենին հեռացրել են պաշտոնից:
Նշենք, որ Կապանի ԲԿ-ի հիվանդներից մեկը՝ 18-ամյա Աստղիկ Հ.-ն, ոստիկանությանը հայտնել էր, որ 53-ամյա անեսթեզիոլոգ Անուշավան Կարապետյանը փորձել է բռնաբարել նրան:
Ինչ վերաբերում է խոսակցություններին, թե մարզպետ Հակոբյանն ազատվում է նախկին մարզպետ Սուրիկ Խաչատրյանի կադրերից, որոնցից է նաև Սմբատ Օրբելյանը, Հակոբյանն ասել է, որ Սմբատ Օրբելյանը Սուրիկ Խաչատրյանի կադրը երբեք էլ չի եղել:
Ըստ մարզպետի` ինքը ցանկանում է Սյունիքի մարզի բուժական համակարգում ստեղծել նորմալ, առողջ մթնոլորտ: «Ես դրան հասնելու եմ: Ինձ արդեն հաջողվել է նման փոփոխություններ անել: Հենց հիմա փոփոխություններ արվում են Սիսիանի և Գորիսի հիվանդանոցներում, հենց հիմա նախագահի վերահսկողության վարչությունն է ուսումնասիրություններ կատարում, և հիմա հերթը հասել է Կապանի հիվանդանոցին»,- հայտնել է նա:
Սմբատ Օրբելյանի հետ հանդիպումից հրաժարվելու հետ կապված էլ մարզպետն ասել է, որ ինքը հանդիպել է Օրբելյանի հետ: «Նրան առաջարկվել է դեմքը փրկելու համար դիմում գրել, սակայն նա հրաժարվել է: Դրանից հետո ես նրա հետ հանդիպելու ոչ մի խնդիր և ոչ մի բան չունեի»,- ընդգծել է Հակոբյանը:
Մարզպետի խոսքով` հիմա քաղաքում փորձ է կատարվում տուժողներին գումարով կամ այլ կերպ համոզել, որ նրանք իրենց դիմումները հետ վերցնեն:
«Անընդունելի իրավիճակ է ստեղծվել քաղաքում, որը պահանջում է հանգուցալուծում, ինչն էլ ես արել եմ»,- եզրափակեց Հակոբյանը:
Նշենք, որ Կապանի ԲԿ-ում մահացության վերջին դեպքը գրանցվել էր 2016թ. դեկտեմբերի 25-ին: «Կապանի ԲԿ» ՓԲ ընկերությունից ահազանգ էր ստացվել, որ ընկերության մանկաբարձագինեկոլոգիական բաժանմունքում գրանցվել է նորածնի, այնուհետև վերջինի մոր՝ 1990թ. ծնված Մարինե Իվանյանի մահը:
