ԵՐԵՎԱՆ, 16 հունվարի – Sputnik. Դաչա-Սուու գյուղի բնակիչ Բաքտիգյուլ Կուբատովան, որը տուժել էր Բիշքեկում տեղի ունեցած ավիավթարի արդյունքում, հայտնել է, որ բեռնատար ինքնաթիռի վթարման ժամանակ իրենց տունը սկսեց փլվել, իսկ նրա ընտանիքի անդամները հրաշքով փրկվեցին։ Կուբատովի խոսքով, երբ տեղի ունեցավ ավիաաղետը, ինքը, փոքր դուստրն ու որդին քնած էին, հայտնում է Sputnik Ղրղըզստանը։
«Աչքերս բացեցի, պատուհանի մեջ կրակ տեսա։ Չհասցրեցի ինչ-որ բան հասկանալ, երբ մեզ վրա սկսեց փլվել առաստաղը։ Որդուս ծածկեցի վերմակով, ինքս էլ անշարժ պառկած էի։ Դուստրս քնած էր կողքիս, բազմոցին», — հիշում է տեղի բնակչուհին։ Կուբատովան պատմել է, որ անդադար օգնության էր կանչում։
«Մենք հրաշքով փրկվեցինք։ Մի պահ ամեն ինչ կանգ առավ, և ես սկսեցի կանչել ամուսնուս։ Նա հարևանի հետ հանեց մեզ փլատակների տակից։ Դուրս եկանք փողոց, ամենուրեք կրակ էր։ Ես մինչև հիմա շոկի մեջ եմ, չեմ հասկանում, թե ինչպես մենք ողջ մնացինք։ Չգիտեմ` ուրախանա՞լ, թե՞ լալ», — ասել է կինը։ Այժմ նրանց ընտանիքը մնացել է առանց տանիքի։ Կուբատովան չգիտի` արդյո՞ք փրկվել են հարևանները։
Բեռնատար օդանավը վթարի է ենթարկվել երկուշաբթի առավոտյան Դաչա-Սուու գյուղում «Մանաս» օդանավակայանի մոտակայքում։
Նա իրականացնում էր Հոնկոնգ-Ստամբուլ չվերթը և պետք է կանգ առներ Բիշքեկում` լիցքավորվելու համար։ Պաշտոնական վերջին տվյալների համաձայն, զոհվել է 31 մարդ` օդանավի անձնակազմն ու տեղի բնակիչներ։
Դեպքի վայրում են վարչապետ Սոորոնվայ Ժեենվեկովն ու կառավարության անդամներ։ Գլխավոր դատախազությունը քրեական գործ է հարուցել` ավիաաղետի փաստով։
