ԵՐԵՎԱՆ, 16 հունվարի — Sputnik. Le Journal du dimanche կիրակնօրյա թերթը հրապարակել է ամերիկյան հեռուստաաստղ Քիմ Քարդաշյանի ցուցմունքի սղագրական հաշվետվությունը, որը նա տվել է ոստիկանությանը 2016 թվականի հոկտեմբերի սկզբին կողոպուտից հետո: Այս մասին հայտնում է ՌԻԱ Նովոստին:
Ավելի վաղ հայտնել էին, որ Քարդաշյանի գործով 10 կասկածյալի է մեղադրանք է առաջադրվել: Դրանց թվում էր նաև հանցագործության ենթադրյալ կազմակերպիչը:
«Դռան մոտ քայլերի ձայն լսեցի, բղավեցի իմանալու համար, թե ով է, բայց ոչ ոք չպատասխանեց… Դռան հետևում տեսա երկու տեղամարդու, հետո՝ գրանցման սեղանին կապված մի մարդու: Երկու տղամարդու դեմքերն էլ փակ էին, նրանցից մեկը լեռնադահուկային դիմակով էր, ձեռքին՝ գլխարկ, հագին՝ «ոստիկանություն» գրությամբ բաճկոն», — թերթը մեջբերում է Քարդաշյանի ցուցմունքը:
Նա նշել է, որ երկրորդ տղամարդու հագին նույնպես ոստիկանի համազգեստ է եղել: Նրա խոսքով` երկուսն էլ եվրոպական արտաքին են ունեցել և բավական բարձրահասակ են եղել:
Ինչպես հայտնել է Քարդաշյանը, կողոպուտի ժամանակ նա միայն գիշերազգեստով է եղել: Քիմը պատմել է, թե ինչպես են իրեն կապել կպչուն ժապավենով և լարերով: Երբ կողոպտիչները փախուստի են դիմել, Քարդաշյանը կարողացել է ինքնուրույն ազատվել կապանքներից: Քիմի խոսքով՝ «նրանք անփորձ էին, կապելու լավ հմտություններ չունեին»:
«Կողոպուտի ժամանակ նրանց մոտ էր հյուրանոցի բջջային հեռախոսը, որն անդադար զնգում էր, նրանք ֆրանսերեն էին խոսում: Ինձ թվաց, որ ասացին՝ հեռանալու ժամանակն է», — նշել է Քարդաշյանը:
Ցուցմունքներում նա նաև թվարկել է գողացված իրերի ցանկը: Քարդաշյանին կողոպտելու դեպքը տեղի էր ունեցել Փարիզում, հոկտեմբերի 2-ի լույս 3-ի գիշերը։ Կողոպտիչները գողացել էին 5 մլն եվրոյի թանկարժեք իրերով զարդատուփը, չորս մլն եվրո արժողությամբ մատանին ու երկու բջջային հեռախոսները։
Հարձակումն իրականացրած անձինք ոստիկանական համազգեստով էին եղել և դիմակներով։ Նրանք կապել էին զոհին ու փակել լոգարանում։ Քարդաշյանի ներկայացուցիչը հայտնել էր, որ աստղը չի տուժել, բայց շոկային վիճակում է հայտնվել։ Քարդաշյանը ոստիկանությունում ցուցմունք էր տվել, որից հետո լքել էր երկիրը։
