ԵՐԵՎԱՆ, 15 հունվարի — Sputnik. Նելլի Դանիելյան. Մառախլապատ ձմեռներն Արարատյան դաշտին հատուկ են՝ ուժեղ կամ թույլ, երկարատև կամ կարճ, բայց դրանք գրեթե ամեն տարի լինում են:
Սա մասնագետների կարծիքն է, որի համար վկայակոչվում է նաև վիճակագությունը: Արարատյան դաշտը մառախլապատ ձմեռ է ունեցել նաև 1950, 1953 և 1956 թվականներին: Ընդ որում, ամենաերկարատևը՝1953-ին, երբ մառախուղը Երևանն ու Արաատյան դաշտը ծածկել է գրեթե ամբողջ ձմեռ՝ 90 օր:
Եթե այս հաշվարկով առաջնորդվենք, մառախուղին ու ցրտին դիմանալու դեռ 70 օր ունենք, քանի որ այսօր լրացավ երևանյան մառախուղի ուղիղ 20-րդ օրը:
Դեկտեմբերին Հայաստան եկած ու Արարատյան դաշտի ցածրադիր հատվածում հանգրվանած անտիցիկլոնը կարծես թե չի էլ շտապում հեռանալ: Ցածր վայրերում կուտակված՝ առավել մեծ խտություն և կշիռ ունեցող սառը օդը թույլ չի տալիս, որ Հայաստանի մնացած տարածքում ձևավորված տաք օդային զանգվածները գրավեն նաև Արարատյան դաշտն ու Երևանը:
Ի դեպ, հիդրոօդերևութաբանների այս մեկնաբանությանն այնքան էլ չեն հավատում որոշ բնապահպաններ, որոնք պնդում են, որ երևանյան մառախուղը Արարատյան դաշտում ավելացած ջրային բաց տարածությունների հետևանք է: Նրանց կարծիքով՝ մառախուղն առաջանում է վերջին տարիներին Արարատյան դաշտում սնկի պես աճած ձկնաբուծարանների ու արհեստական լճերի մակերևույթից գոլորշիացած մեծ քանակությամբ ջրերից:
Եթե այս տարի որպես մառախուղի հիմնական պատճառ մասնագետները նշում են ցուրտ օդային զանգվածների ներհոսքը, ապա անցյալ տարի ձմռանը, երբ ջերմաստիճանը Երևանում հիմնականում 0-ին մոտ էր, հունվարին մայրաքաղաքը դարձյալ հայտնվել էր մառախուղի մեջ: 2016թ-ի տաք մառախուղը նույնիսկ խանգարեց ռուս օդաչուներին «Էրեբունի» օդանավակայանում ուսումնական թռիչքներ իրականացնել:
Համեմատության համար նշենք, որ աշխարհի ամենամառախլապատ մայրաքաղաք Լոնդոնում մառախլապատ օրերի քանակը տարվա ընթացքում չի գերազանցում 45-ը: Փաստորեն, ևս 20-25 օր դիմանանք և կհաղթենք Լոնդոնին:
