ԵՐԵՎԱՆ, 14 հունվարի — Sputnik, Նելլի Դանիելյան. ԵԱՀԿ անդամ պետությունները դեռ չեն որոշել՝ կշարունակի՞ գործել ԵԱՀԿ երևանյան գրասենյակը, թե՞ կփակվի: Sputnik Արմենիային ԵԱՀԿ երևանյան գրասնյակից հայտնեցին, որ կառույցում շարունակվում են այս հարցի շուրջ քննարկումները, և ցանկացած պահի կարող է որոշում կայացվել:
ՀՀ ԱԳՆ-ն դեռևս ձեռնպահ է մնում ԵԱՀԿ երևանյան գրասենյակի շուրջ ստեղծված իրավիճակի մասին մեկնաբանություններից ու կենտրոնական գրասենյակում ընթացող քննարկումների մասին մանրամասներ հրապարակելուց: Չնայած դրան, որոշ վերլուծությունների համաձայն, ստեղծված իրավիճակում դերակատարություն ունի Ադրբեջանը: Բանն այն է, որ Հայաստանն այսօր Հարավային Կովկասի տարածաշրջանում միակ երկիրն է, որտեղ ԵԱՀԿ գրասենյակ կա: Կառույցի՝ Բաքվում գտնվող գրասենյակն իր գործունեությունը դադարեցրել է 2014-ին, Թբիլիսիինը՝ 2009 թվականի հունվարի 1-ից:
«Հայացք» վերլուծական կենտրոնի վերլուծաբան Աննա Կարապետյանը Sputnik Արմենիայի հետ զրույցում նշեց, որ Ադրբեջանը, որպես ԵԱՀԿ անդամ պետություն, ունի ձայնի իրավունք և կարող է իր մեկ ձայնով որոշիչ լինել: Հարցին, թե ինչ կլինի, եթե գրասենյակն, այնուամենայնիվ, որոշվի փակել:
«Ըստ էության, սարսափելի ոչինչ չի լինի, քանի որ ՀՀ-ն ԵԱՀԿ անդամ է, ԵԱՀԿ-ն Հայաստանի համար գործընկեր կառույց է, որի հետ հարաբերությունները մշտապես եղել ն բարձր մակարդակի վրա: Եվ եթե անգամ գրասենյակը փակվի, դա ընդհանուր առմամբ ԵԱՀԿ-ՀՀ հարաբերույունների վրա բացասական ազդեցություն չի ունենա, քանի որ նախաձեռնությունն ի տարբերություն նույն Ադրբեջանի, Հայաստանինը չէ»,- ասաց Աննա Կարապետյանը:
Բայց ԵԱՀԿ գրասենյակի փակումը քաղաքական ենթատեքստով, ըստ վերլուծաբանի, կարող է բացասական նախադեպ ձևավորել, երբ մի երկրի միանձնյա որոշմամբ եվրոպական կառույցը կարող է իր գրասենյակը հանել մեկ այլ երկրի տարածքից:
«Սա, ըստ էության, բացասական կլինի ամբողջ կառույցի համար և ցույց կտա, որ նման նախադեպերի անհրաժեշտ կանխարգելման բացակայության պարագայում նման նախադեպերը հետագայում տարածվում են և կարող են ամբողջ կառույցի հետագա գործունեության համար խոչընդոտներ առաջացնել: Եվ դա այն դեպքում, երբ շատ կարևոր է թե՛ ամբողջ տարածաշրջանի, թե՛ մասնավորապես ԼՂ-ի համար, որ ԵԱՀԿ-ն իր գործունեություն ծավալի ոչ միայն Ադրբեջանում և Հայաստանում, այլ նաև թեկուզ ԵԱՀԿ ՄԽ համանախագահության ներկայացուցչության տեսքով ԵԱՀԿ-ն մշտապես ներկայացված լիներ նաև Արցախում»,- ասաց Աննա Կարապետյանը:
Ինչ վերաբերում է Հայաստանում ԵԱՀԿ-ի ծրագրային ու ֆինանսական աջակցությամբ իրականացվող ծրագրերին, մեր զրուցակցի համոզմամբ, դրանք ևս որոշ չափով վնաս կկրեն գրասենյակի փակման հետևանքով:
Այսպիսով, մեր զրուցակցի դիտարկմամբ, Երևանում ԵԱՀԿ երևանյան գրասենյակի փակումից Հայաստան-ԵԱՀԿ քաղաքական հարաբերությունները չեն տուժի, բայց կտուժեն կառույցի հետ իրականացվող առանձին ծրագրերը: Այս դեպքում, Աննա Կարապետյանի խոսքով, ԵԱՀԿ-ի կիսատ թողած ծրագրերի ֆինանսավորումը ստիպված կլինի շարունակել ՀՀ իշխանությունը, եթե, իհարկե, դրա համար բավարար քաղաքական կամք ունենա:
ԵԱՀԿ երևանյան գրասենյակը բացվել է 1999թ. հուլիսին: Յուրաքանչյուր տարի որոշում է կայացվում դրա գործունեությունը 12 ամսով երկարաձգելու վերաբերյալ: Որոշումներն ընդունվում են կոնսենսուսով, ինչն առայժմ հնարավոր չի լինում ապահովել:
Այսօր փակման հարցի առաջ են կանգնած նաև ԵԱՀԿ-ի՝ Ուզբեկստանում և Ղրղըզստանում գտնվող գրասենյակները:
