ԵՐԵՎԱՆ, 8 հունվարի — Sputnik, Դավիթ Գալստյան. Հայաստանի զինված ուժերը սպասում են նորակոչիկներին, որոնց առաջին խումբն այսօր հավաքվել է Երևանի կենտրոնական զինկոմիսարիատում:
Այստեղ նրանց սպասում է բժշկական հետազոտություն, համազգեստի բաժանում (նորամուծություններից մեկը), ինչպես նաև վիճակահանություն, որով կորոշվի ծառայությունն անցկացնելու վայրը:
Սպաներին հետաքրքրում է նորակոչիկների երկրորդ քաղաքացիության, դատվածության, կրթության առկայությունը, նրանց ընտանեկան դրությունը և դաջվածքները (բանակում արգելված է դաջվածք անել):
Սակայն զորակոչիկներին և նրանց ծնողներին այս փուլում ավելի շատ հետաքրքրում է, թե որտեղ է անցնելու ծառայությունը: Ապագա զինվորներն իրենք են քաշում զորամասի համարը, ոմանք (անավարտ բարձրագույն կրթություն ունեցողները)՝ երկու անգամ, քանի որ առջևում նրանց սպասում է ուսումնական փուլը:
Հայացք ներսից
Հենց այնտեղ են վերջին հրահանգները տալիս պաշտպանության նախարար Վիգեն Սարգսյանը և Հայաստանի ԶՈՒ գլխավոր շտաբի պետ Մովսես Հակոբյանը:
«Մեզ հերթական անգամ զարմացրեց մեր տղաների տրամադրվածությունը, և մենք խոստացանք, որ անհրաժեշտ ամեն ինչ կանենք, որպեսզի նրանք զգան փոփոխությունները, որոնք թույլ կտան ծառայություն անցնել ավելի հարմարավետ պայմաններում», — լրագրողներին ասաց Վիգեն Սարգսյանը:
Նա նշեց, որ փոփոխություններից է զինկոմիսարիատում համազգեստի հանձնումը, ինչը կարևոր է զորակոչիկների հարմարության համար:
Ի պատասխան որոշ ծնողների դժգոհությունների՝ կապված բժշկական ստուգման հետ, նախարարը նշեց, որ բանակին պետք են առողջ զինվորներ:
«Մյուս կողմից, բանակում առանձին մոտեցում է ցուցաբերվում զինվորներին, որոնք պիտանի չեն շարային ծառայության համար և առողջական պատճառներով այլ սահմանափակումներ ունեն», — ասաց Սարգսյանը՝ նշելով, որ բժշկական հանձնաժողովները փորձում են մանրամասն ուսումնասիրել նորակոչիկների առողջական վիճակը:
Նրա խոսքով՝ զինվորների առողջության նկատմամբ ուշադրությունը չի սահմանափակվում զորակոչային հանձնաժողովով, այլ անցկացվում է նաև ծառայության ընթացքում:
Հայաստանի զինված ուժերի գլխավոր շտաբի պետն իր հերթին նշեց, որ բանակում յուրաքանչյուր պաշտոն սահմանափակումներ ունի՝ կապված առողջական վիճակի հետ: Հակոբյանը պատասխանեց նաև բոլորին հետաքրքրող մեկ այլ հարցի. զինվորները մարտական հերթապահություն կիրականացնեն ուսուցումից վեց ամիս հետո միայն: Նրա խոսքով՝ ստեղծվել են բոլոր պայմանները վիճակահանության այն արդար անցկացման համար: «Ծնողները կարող են հետևել վիճակահանությանը: Պաշտպանության նախարարությունը և գլխավոր շտաբը վճռական են տրամադրված այս հարցում, որպեսզի արդարության սկզբունքը պահպանվի և զորակոչիկը ծառայի այն զորամասում, որի համարը քաշել է», — ասաց Հակոբյանը:
Հայացք դրսից
Նորակոչիկները բավական լավատեսորեն էին տրամադրված: 18-ամյա Վիգենը՝ Մասիսից ասաց, որ տրամադրությունը բարձր է, բարոյապես պատրաստ է ծառայության: Նրա 16-ամյա եղբայրը նույնպես պատրաստվում է ծառայել բանակում:
«Տրամադրությունս բարձր է և, կարևոր չէ, թե ուր կընկնեմ: Իհարկե, հարմար կլինի, եթե տանը մոտ լինեմ, բայց այդքան կարևոր չէ: Ծառայությունից հետո շատ բան է փոխվում, բայց առայժմ չգիտեմ, թե հատկապես ինչ (ժպտում է)», — ասաց Վիգենը:
Էդգարն ընտանիքի միակ որդին է: Նա համոզված է, որ ծառայությունը նորմալ կանցնի՝ անկախ զորամասի վայրից:
«Ծառայությունը տղամարդու համար է, յուրաքանչյուրը պետք է ծառայի, դա լավ բան է», — համոզված է Էդգարը:
Մի սենյակ այն կողմ, որտեղ վիճակահանության սպասումով նստած են նորակոչիկները, հավաքվել են նրանց ծնողները: Երևանցի Վոլոդյա պապիկը ճանապարհում է թոռնիկին, ասում է, որ հանգիստ է նրա համար:
«Ամենակարևորը, որպեսզի խաղաղություն լինի, որ ինչպես գնում են, այնպես էլ վերադառնան: Կարևոր չէ, թե որտեղ կծառայի, գլխավորը, որպեսզի խաղաղ լինի», — ասաց Վոլոդյան:
Երկու որդիների հայր Նիկողայոսը բանակ է ճանապարհում առաջին որդուն, հաջորդ տարի նա կճանապարհի կրտսերն որդուն: Ասում է, որ հիանալի տրամադրություն ունի:
«Մեծ ուրախությամբ ենք ճանապարհում: Մաղթում եմ՝ երկիրը խաղաղ ապրի, իսկ նրանք ծառայեն մեզ և պետության համար: Ինձ համար ամենագլխավորը խաղաղությունն է», — ասաց Նիկողայոսը:
Նա չի վախենում հեռավորությունից, ասում է, որ հայոց երկրի տարբեր անկյուններում է եղել, այցելել ազգականներին, որոնք ծառայել են բանակում: Նրա խոսքով՝ որդին նույնպիսի տրամադրություն ունի և ոչնչից չի վախենում:
Կանայք ավելի զգացմունքային են և անհանգստանալով սպասում են վիճակահանությանը, ինչպես նաև որդիների ծառայության մասին ցանկացած նորության: Որոշ ծնողներ զրուցում են գլխավոր շտաբի ղեկավարի հետ, որը փորձում է հանգստացնել նրանց:
«Ուժեղ եղեք, լավ կծառայեն, խաղաղություն կլինի…», — լսվում է նրա խոսքից մի հատված:
Նյութի ռուսերեն տարբերակը
