ԵՐԵՎԱՆ, 2 հունվարի — Sputnik. Ղազախստանի Շախան գյուղում փլուզվել է բազմահարկ շենքի մի մասը, մահացել է 9 մարդ, կատարվում է փլատակների մաքրում, հաղորդում է Sputnik Ղազախստանը՝ հղում անելով արտակարգ իրավիճակների հանձնաժողովի պաշտոնական ներկայացուցիչ Ռուսլան Իմանկուլովին, ինչպես նաև «թեժ գծի» օպերատորին:
Աղբյուրի խոսքով՝ հունվարի 1-ին ժամը 22:40-ին Կարագանդինյան շրջանի արտակարգ իրավիճակների բաժանմունք ահազանգ է ստացվել Շախան գյուղում բազմահարկ շենքի փլուզման մասին: Անհապաղ դեպքի վայր են մեկնել փրկարարական ուժեր և միջոցներ, կատարվել է շենքի բնակիչների տարհանում, նշել է Իմանկուլովը:
Նախնական վարկածով՝ փլուզումը տեղի է ունեցել ջեռուցման կաթսային պայթյունի հետևանքով:
Հաղորդվում է, որ փլատակները հեռացնելու աշխատանքները կկատարվեն այնքան ժամանակ, մինչև վերջնականապես կհամոզվեն, որ փլատակների տակ կենդանի մնացածներ կամ զոհեր չկան: Խնդիր է դրվում հասնել նկուղային տարածքին, որտեղ գտնվում է ջեռուցման համակարգը: Միջադեպի բոլոր հանգամանքները հետաքննելու համար ստեղծվելու է հանրապետական հանձնաժողով:
Նյութի ռուսերեն տարբերակը
