ԵՐԵՎԱՆ, 30 դեկտեմբերի — Sputnik, Արմենուհի Մխոյան. 2016թ. դեկտեմբերի 30-ին ՀՀ ֆինանսների նախարարության և Գյումրի համայնքի միջև ստորագրվեց «Գյումրու քաղաքային ճանապարհներ» ծրագրի իրականացման համաձայնագիրը, որը ստորագրեցին ՀՀ ֆինանսների նախարար Վարդան Արամյանը և Գյումրու քաղաքապետ Սամվել Բալասանյանը:
Ծրագրի հիմնական նպատակն է Գյումրի քաղաքում ունենալ բարեկարգ փողոցներ և էներգախնայող արտաքին լուսավորության ցանց՝ անվտանգ երթևեկության կազմակերպման համար։
Ծրագրի ընդհանուր արժեքը կազմում է մոտ 23 840 000 եվրո, որից 14 600 000 եվրո վարկային միջոցներ տրամադրվում են Վերակառուցման և զարգացման եվրոպական բանկի (ՎԶԵԲ) կողմից:
«Տեսա՞ք` այլևս այս գումարի տրամադրումը ընտրությունների հետ չկապեք»,- չմոռացավ ասել Սամվել Բալասանյանը:
Ծրագիրն իրականացվելու է 3 տարում՝ 3 փուլով: Վարկային մասը մարվելու է տարիների ընթացքում: Առաջիկա երեք տարվա ընթացքում մարվելու են միայն տոկոսները: Վարկային այս գումարով քաղաքում նախատեսվում է վերականգնել մոտ 16 կմ ճանապարհ: Բացի փողոցների վերականգման աշխատանքներից, նախատեսվում է նաև Գյումրիում խնայող լամպեր տեղադրել, ավելացնել լուսակետերը։ Կարելի ասել` այն, ինչին գյումրեցին շատ էր սպասել, իրականություն կդառնա, և քաղաքի բնակիչները վերջապես բարեկարգ փողոցներ կունենան:
Երկկողմ համաձայնագիրը ստորագրվեց ու ներկաների կողմից ընդունվեց ծափերով ու հոտնկայս: Սամվել Բալասանյանն էլ, ծրագրից ոգևորված, շնորհակալություն հայտնեց Բարձրյալին. «Ինչպես ասում են, տեր Աստված»:
Ծրագրի շրջանակներում, մասնավորապես, նախատեսվում է իրականացնել Գյումրի քաղաքի ճանապարհների հիմնանորոգման և փողոցների արտաքին լուսավորության ցանցի արդիականացման աշխատանքներ, այդ թվում` ասֆալտի և մայթերի նորոգում, ինչպես նաև ջրահեռացման ենթակառուցվածքների արդիականացում, հետիոտնային նոր տարածքների կառուցում, քաղաքային լուսավորության ենթակառուցվածքների վերակառուցում և Գյումրի քաղաքի համար ավտոկայանատեղիների վերաբերյալ ռազմավարության մշակում:
Ծրագրի իրականացման համար հայտարարվել է խորհրդատուների մրցույթ, իսկ եթե հաջողվի խորհրդատուներին համոզել ու 22 սմ հաստություն ունեցող ասֆալտի փոխարեն 18 սմ ասֆալտային շերտ անել՝ Գյումրին ավելի շատ միջազգային չափորոշիչներին համապատասխան բարեկարգ փողոց կունենա:
«Կարծում եմ, որ այս ծրագիրն էապես կփոխի Գյումրու դեմքն, ու մենք կարող ենք մասնավոր հատվածին շահագրգռել, որ ծրագրեր իրականացնի Գյումրիում: Սա համատեղ ու միասնական ծրագիր է, և մենք քաղաքապետարանի հետ ջանք ենք թափելու, որ արդյունավետ լինի»,- նշեց ՀՀ ֆինանսների նախարարը:
Օգտվելով առիթից նախարարը շնորհավորեց բոլոր գյումրեցիներին՝ մաղթելով, որ գալիք տարին քաղաքի համար լինի առաջընթացի ու զարգացման տարի, իսկ յուրաքանչյուրի ընտանիքում լինի խաղաղության, սիրո ու բարգավաճման տարի:
