ԵՐԵՎԱՆ, 29 դեկտեմբերի — Sputnik. 2016-ը քաղաքական առումով բարդ տարի էր, ՀՀԿ ԳՄ նիստից հետո լրագրողների հետ հանդիպմանն ասաց ՀՀԿ խոսնակ Էդուարդ Շարմազանովը`նշելով, որ նիստի ընթացքում քննարկվել են 2016թ.-ի կարևոր իրդարձությունները:
«Սահմանադրական հանրաքվեից հետո առաջին տարին էր, երբ մեր վրա զգացինք սահմանադրական բարեփոխումների ազդեցությունը: Եթե չլիներ ապրիլյան քառօրյա պատերազմը՝ բարեփոխումները, որոնք մեկնարկեցին հուլիսից հետո, ավելի շուտ կլինեին»,-ասաց Շարմազանովը:
ՀՀԿ-ի դիտարկմամբ, 2016թ. ծանր էր նաև անվտանգության մարտահրավերների առումով, հատկապես՝ ապրիլյան քառօրյա պատերազմին առնչվող:
«Ադրբեջանի նպատակն էր նոր էջից սկսել բանակցությունները՝ ծանր իրավիճակի մեջ դնելով Հայաստանի եւ ԼՂՀ իշխանություններին բանակցային պրոցեսում, որը չհաջողվեց»,-ասաց Շարմազանովը` հավելելով, որ Հայաստանի իշխանությունները հստակ հայտարարել են, որ 1994-1995թ.թ. զինադադարի պայմաններն անհերքելի են:
Անդրադառնալով տարվա ընթացքում իրականացված կառավարության ու վարչապետի փոփոխություններին՝ Էդուարդ Շարմազանովը նշեց, որ ՀՀԿ-ն գոհ է Կարեն Կարապետյանի կառավարության աշխատանքից:
«Կարապետյանի կառավարությունը ապացուցեց, որ ինքն ի զորու է իրականացնել այն գործառույթները, սկզբունքները, որոնք նախանշել է Կարեն Կարապետյանի հանրապետական եւ դաշնակցական նախարարներից կազմված կառավարությունը»,- ասաց նա:
