ԵՐԵՎԱՆ, 28 դեկտեմբերի — Sputnik. Ուկրաինական СТБ հեռուստաալիքով հեռարձակվող շոուի ընթացքում մրցում են սկսնակ խոհարարները։ Վեցերորդ խաղաշրջանի հաղթող է դարձել հայուհի Հասմիկ Գասպարյանը։
Չորս ամիս տևած լարված պայքարից հետո «ՄաստերՇեֆ-6» շոուի եզրափակիչ փուլ էին դուրս եկել Կատյա Պեսկովան և Հասմիկ Գասպարյանը։
Չեմպիոնի կոչման համար որոշիչ պայքարում աղջիկները պետք է պատրաստեին և ժյուրիի դատին հանձնեին երեք ճաշատեսակ` նախուտեստ, հիմնական ճաշատեսակ և աղանդեր։
Ճաշատեսակների պատրաստման համար աղջիկները երկու ժամ ունեին։ Հասմիկը խոստովանել է, որ իրեն վախեցրել է աղանդերի մրցույթը։
«Ես ցնցվեցի, երբ պարզվեց, որ եզրափակիչ փուլում պետք է պայքարեմ աղանդերի թագուհու դեմ», — խոստովանել է Հասմիկը։
Հայուհու մտահոգությունն իզուր չէր, քանի որ նրա պատրաստած աղանդերը բոլորովին չզարմացրեց ժյուրիի անդամներին։ Ավելին` նրա պատրաստած աղանդերը մի փոքր պինդ էր ստացվել։
Իրավիճակը փրկեց գառը. Հասմիկը որոշեց մատուցել այն որպես հիմնական ճաշատեսակ։ «Նախագծի ընթացքում գառան մսից ոչինչ չէի պատրաստել, հետո հիշեցի, որ տանը տղեմալիով ենք այն ուտում»,- ասել է նա։
![Հասմիկ Գասպարյանի պատրաստած ուտեստը Հասմիկ Գասպարյանի պատրաստած ուտեստը - Sputnik Արմենիա](https://cdn.am.sputniknews.ru/img/594/54/5945422_66:0:961:562_600x0_80_0_0_07fd487b23fda35d7a0d50b9c3a0d7b8.jpg)
![Հասմիկ Գասպարյանի պատրաստած ուտեստը Հասմիկ Գասպարյանի պատրաստած ուտեստը - Sputnik Արմենիա](https://cdn.am.sputniknews.ru/img/594/55/5945521_29:0:924:563_600x0_80_0_0_2ed08a84c2585b945c8621f407d13207.jpg)
![Հասմիկ Գասպարյանի պատրաստած ուտեստը Հասմիկ Գասպարյանի պատրաստած ուտեստը - Sputnik Արմենիա](https://cdn.am.sputniknews.ru/img/594/55/5945581_55:0:950:562_600x0_80_0_0_bea29e0539991d9c2b72f45a037f00c5.jpg)
![Հասմիկ Գասպարյանը հեռուստաշոուի ժամանակ Հասմիկ Գասպարյանը հեռուստաշոուի ժամանակ - Sputnik Արմենիա](https://cdn.am.sputniknews.ru/img/594/52/5945292_14:0:909:562_600x0_80_0_0_17c35d7087b68d2b3203ec8e34a25c01.jpg)
Ուտեստը ներկայացնելուց հետո ժյուրին նշեց, որ ափսեի վրա շատ խաղող կա, և մասնակիցն իր պատրաստած ուտեստը չպետք է զարդարեր ուտելու համար անպիտան եղևնու ճյուղերով։ Սակայն միսը լավ էր տապակած, ինչը ստվերեց ուտեստի բացասական կողմերը։
Բայց ժյուրին անակնկալի եկավ, երբ պարզվեց, որ խաղողի որոշ հատիկներն իսկական չեն և պատրաստված են մոլեկուլյար խոհանոցի տեխնիկայի կիրառմամբ։ Արհեստական հատիկներում սերուցքային մուս էր։
Բոլոր մրցույթների արդյունքում Հասմիկին հաջողվեց առաջ անցնել մրցակցից և 500 հազար գրիվեն (շուրջ 20 հազար դոլար) մրցանակ ստանալ։ Նա կկարողանա նաև սովորել ֆրանսիական հեղինակավոր Le Cordon Bleu դպրոցում։