ԵՐԵՎԱՆ, 26 դեկտեմբերի — Sputnik. Շների հավատարմության օրինակները բազում են. Խատիկո, Սպիտակ Բիմ Սև ականջ, Մուխտար անունները կենդանու հավատարմության ու անսահման նվիրվածության վառ ապացույցներ են։
Շների հավատարմության հերթական պատմությունը ցնցել է սոցցանցերի օգտատերերին։ Վերջին օրերի տխուր իրադարձությունների ֆոնին կենդանու հավատարմության և նվիրվածության պատմությունը շատերին է հուզել։
Դենիս Մալաֆեևը Ֆեյսբուքի իր էջում գրել էր, որ Ցեգլովկա գյուղում, երկաթգծի վրա երկու օր շարունակ շներ են պառկած։
«Տեղ հասնելուն պես պարզվեց, որ գնացքը վնասել էր էգ շանը, և նա ինքնուրույն տեղաշարժվել չէր կարողանում։ Կենդանուն գծերից հանելու փորձերն ապարդյուն անցան, քանի որ արուն ամեն գնով պաշտպանում էր մեզանից։ Ես նկատեցի դեպի մեզ շարժվող գնացքը և շփոթվեցի։ Մեքենավարի զանգը լսելով` արուն մոտեցավ էգին, գրկեց նրան և պառկեց կողքը։ Երկու շներն էլ իջեցրին գլուխները, և գնացքն անցավ։ Բարեկամներ, արուն երկու օր շարունակ այդպես պաշտպանում էր էգին։ Նա երկու օր անընդմեջ տաքացնում էր էգին, որ չմրսի։ Չգիտեմ` ինչպես կոչեմ սա` բնա՞զդ, սե՞ր, ընկերությու՞ն, հավատարմությու՞ն։ Միայն մի բան գիտեմ` ոչ բոլոր մարդիկ են այդպես վարվում։ Սա ուսանելի պատմություն է բոլորիս համար։ Այո, այո։ Շնորհակալություն Վերային, Խաչատուրին, Քրիստիանին և բոլոր նրանց, ովքեր զանգահարեցին ու անտարբեր չմնացին»,- գրել է Մալաֆեևը։
Փրկված շները տեղափոխվել էին ապաստարան, կամավորները փնտրում էին տերերին։Գրառման հեղինակը հորդորել էր եզրակացություն անել այս պատմությունից և օգնել կարիքավորներին։ Ավելի ուշ Մալաֆեևը գրել էր, որ Պանդայի և Լյուսիի տերերին գտել են։
«Բարեկամներ, ուզում եմ լարվածությունը մի փոքր թուլացնել, շները ողջ և առողջ են, ստացել են մասնագիտական բուժօգնություն, կոտրվածքներ չկան, վնասվածքներ և կապտուկներ ունեն։ Տերերը գտնվել են։ Արուի անունը Պանդա է, էգինը` Լյուսի», — գրել էր նա։
Օգտատերերն արձագանքել են այս գրառմանը` նշելով, որ մի շարք հարցեր ունեն տերերին։ «Ո՞վ է այդ տերը, որ նրա շները երկաթգծում են թափառում», — գրել է Օլգա Կիրիտչենկոն։
«Պատմությունը ցնցեց մինչև հոգու խորքը։ Խնդրում եմ` գրեք, թե ինչպես են նրանք այդտեղ հայտնվել», — գրել է օգտատեր Տատյանա Կնիժնայան։
«Շնորհակալություն, որ անտարբեր չմնացիք…», — նշել է Տատյանա Նազմուտդինովան։
Նյութի ռուսերեն տարբերակը
