ԵՐԵՎԱՆ, 26 դեկտեմբերի — Sputnik. ՀՀ առաջին տիկին Ռիտա Սարգսյանը նախագահի նստավայրում ջերմ խոսքերով ու դրական լիցքերով դիմավորեց մայրաքաղաքից ու մարզերից եկած ավելի քան 1000 երեխաներին։ Նա բոլորին շնորհավորեց գալիք տոների կապակցությամբ, մաղթեց նախևառաջ հայրենիքը սիրել։
«Պետք է լավ սովորել, հարգել մեծերին, լսել ծնողներին, չվախենալ դժվարություններից և լինել անկեղծ ու սրտացավ։ Այս շարքը կարող եմ երկար շարունակել։ Ես վստահ եմ, որ այս հատկանիշները կան բոլորիդ մեջ»,- ասաց Ռիտա Սարգսյանը։
Երեխաներն ուշադրությամբ լսեցին առաջին տիկնոջն ու շարունակեցին արձագանքել նրա մաղթանքներին ու ոգևորիչ խոսքերին։
Լրատվամիջոցների հետ զրույցում Ռիտա Սարգսյանը հայտնեց, որ մեծ սիրով է շփվում երեխաների հետ։
«Ես երեխաներից դրական լիցքեր եմ ստանում, դրա համար այս գործն ինձ մոտ լավ է ստացվում։ Ինձ զգացմունքներն են ստիպում ժպտալ»,- ասաց նա։
Sputnik Արմենիայի հետ զրույցում էլ նա հիշեցրեց, որ 10 տարի աշխատել է մանկապարտեզում, երեխաների հետ շփումն իր գործն է, որը սիրով է անում։
