ԵՐԵՎԱՆ, 25 դեկտեմբերի — Sputnik, Ալեքսեյ Ստեֆանով. «Սա ուղղակի ողբերգություն է… Հավատս չի գալիս, որ նման բան կարող էր պատահել», — «Արդար օգնություն» հիմնադրամի գործադիր տնօրեն Ելիզավետա Գլինկայի, որը հայտնի է նաև բժիշկ Լիզա անունով, մահվան մասին ասել է նրա ընկեր և գործընկեր Յուրի Պոտապենկոն:
«Նա վերջերս էր պետական մրցանակ ստացել իրավապաշտպան գործունեության ոլորտում աչքի ընկնող ձեռքբերումների համար (դեկտեմբերի 8, խմբ.), ես նրան զանգեցի, շնորհավորեցի: Նա այնքան ուրախ էր: Անընդհատ կրկնում էր. «Շնորհակալ եմ, Յուրոչկա, շնորհակալ եմ Յուրոչկա…»», — հազիվ զսպելով արցունքները՝ պատմում է Պոտապենկոն:
Եկատերինբուրգում նա գլխավորում է «Ծայրահեղ կենսական իրավիճակներում հայտնված մարդկանց աշխատանքի տեղավորելու գործակալութուն» կազմակերպությունը: Պոտապենկոյին 2004թ-ին բժիշկ Լիզայի հետ ծանոթացրել է Ռուսաստանի Պետդումայի պատգամավոր, ներկայում Եկատերինբուրգի քաղաքապետ Եվգենի Ռոյզմանը: Աստիճանաբար ընդհանուր գործը՝ ընչազուրկ մարդկանց օգնությունը, վերածվել է ամուր ընկերության:
«Երբ ես ու կինս՝ Մարիան, Մոսկվա ենք գնում, առաջին հերթին այցելում ենք Լիզային: Նախօրոք զանգում եմ նրան, մոտենում ենք գրասենյակին, և նա շուտով հայտնվում է: Նրա գրասենյակում միշտ իրարանցում է, միշտ շատ մարդիկ կան: Իսկ երբ նա գալիս է Եկատերինբուրգ, անպայման այցելում է մեզ և անօթևան մարդկանց մեր կենտրոն: Նա այնքան սրտաբաց մարդ է: Ես ցանկացած պահի կարող եմ զանգել նրան, կիսվել, բողոքել… Մենք շատ գաղտնիքներ ունենք… Լիզան իսկական ռուս, ոսկե կին է», — Ելիզավետա Գլինկայի մասին դեռ ներկա ժամանակով է խոսում Յուրի Պոտապենկոն:
Նա մի պահ լռում է և ուղղում իրեն. «Ինձ համար նա շատ հարազատ, մտերիմ մարդ էր: Չեմ կարող հասկանալ, որ նման բան է եղել: Կորցնում ենք այն, ինչ չենք կարող կորցնել: Իսկ մենք կորցրեցինք…»:
«Տու-154» ինքնաթիռի վթարի մասին Պոտապենկոն իմացել է ողբերգությունից անմիջապես հետո և կարծես ինչ-որ բան է զգացել:
«Առավոտից չէի կարողանում տեղս գտնել… Արթնացա, կարդացի ողբերգության մասին նորությունը: Սկսեցի զանգահարել Մոսկվա: Իմացա, որ ինքնաթիռում կարող է լինել Լիզան, բայց ես հույսս չեմ կորցնում: Այսինքն, չէի կորցնում… Մինչև վերջ հավատում էի, որ դա սխալ է: Բայց հետո ինձ զանգեցին ու հաստատեցին այդ գույժը», — ասում է Պոտապենկոն:
Բժիշկ Լիզա
Բժիշկ-ռեանիմատոլոգ Ելիզավետա Գլինկան լայնորեն հայտնի է դարձել, արժանացել ժողովրդական սիրո և պաշտոնական ճանաչման հասարակական նախաձեռնությունների ու բարեգործական ակցիաների շնորհիվ:
Բժիշկ Լիզան ծնվել է Մոսկվայում 1962թ-ին: 1986թ-ին ամուսնացել է փաստաբան Պյոտր Գլինկայի հետ և մեկնել ԱՄՆ: Ամերիկայում առաջին քայլերն է կատարել բարեգործության ոլորտում, հինգ տարի աշխատել է մահացող հիվանդների հիվանդանոցներում: Մահացող և անհուսալի հիվանդ մարդկանց օգնությունը դարձել է Ելիզավետա Գլինկայի կոչումը, արդյունքում նա ակտիվ մասնակցություն է ունեցել Առաջին մոսկովյան հոսպիսի աշխատանքում, ինչպես նաև Կիևում հիմնել առաջին հոսպիսը:
Մոսկվայում բժիշկ Լիզան հիմնել է բարեգործական հիմնադրամ, որն օգնություն է ցուցաբերում քաղցկեղով հիվանդներին, ինչպես նաև աղքատ և անօթևան մարդկանց:
Բժիշկ Լիզան մի քանի անգամ մարդասիրական նպատակներով մեկնել է Սիրիա, խաղաղ բնակիչներին դեղորայք բաժանել և բժշկական օգնություն ցուցաբերել: Ելիզավետա Գլինկան մի քանի անգամ ներառվել է Ռուսաստանի 100 ամենաազդեցիկ կանանց ցուցակում: Նրա բարեգործական գործունեության մասին վավերագրական ֆիլմը 2009թ-ին արժանացել է ՏԷՖԻ մրցանակի:
Նյութի ռուսերեն տարբերակը
