ԵՐԵՎԱՆ, 22 դեկտեմբերի — Sputnik. Հայաստանի ԱԺ-ի և Ռուսաստանի Պետդումայի պատգամավորները Երևանում անցկացրած համատեղ նիստի շրջանակում մեկ րոպե լռությամբ հարգեցին սպանված ռուս դեսպան Անդրեյ Կառլովի հիշատակը։
Նման առաջարկով հանդես եկավ Հայաստանի ԱԺ-ի արտաքին կապերի մշտական հանձնաժողովի ղեկավար Արտակ Զաքարյանը։
Պատգամավորները հավաքվել էին Երևանում` ԵՏՄ շրջանակում տնտեսական համագործակցության հեռանկարներն ու ինտեգրման դինամիկան քննարկելու համար։ Այսօր Հայաստանի ԱԺ խոսնակ Գալուստ Սահակյանը ՌԴ Պետական դումայի ԱՊՀ երկրների գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովի հետ հանդիպման ժամանակ ցավակցություն է հայտնել ռուսական կողմին Կառլովի մահվան կապակցությամբ։
«Մենք դատապարտում ենք այդ սարսափելի ահաբեկչական ակտը և կիսում Ռուսաստանի ժողովրդի վիշտը», — ասաց նա։
Ավելի վաղ Հայաստանի արտգործնախարար ղեկավար Էդվարդ Նալբանդյանն այցելել էր Հայաստանում Ռուսաստանի դեսպանատուն և գրառում կատարել ցավակցությունների գրքում։
Այսօր Ռուսաստանի ԱԳՆ-ում տեղի ունեցավ Թուրքիայում Ռուսաստանի դեսպան Անդրեյ Կառլովի հրաժեշտի արարողությունը, որին ներկա էր Ռուսաստանի նախագահ Վլադիմիր Պուտինը։ Նա սրտագին ցավակցություն հայտնեց Կառլովի հարազատներին` մորը` Մարիա Ալեքսանդրովնային, կնոջը` Մարինային, որդուն` Գենադիին, քրոջը` Ելենային։
