ԵՐԵՎԱՆ, 22 դեկտեմբերի — Sputnik. ԱԺ արտահերթ նիստում 3 միջազգային վարկային պայմանագրերի քննարկման ժամանակ ՀԱԿ խմբակցության պատգամավոր Լևոն Զուրաբյանն ասաց, որ այս երեք վարկային պայմանագրերը 180 մլն դոլարով ավելացնելու են պետական պարտքը: «Ընդ որում, այդ վարկերից երկուսն ուղղված են բյուջեի խնդիրների լուծմանը: Այսինքն` որտեղ ծակ ունենք, փորձում ենք փակել այդ վարկերով: Այդ դեպքում շատ պարզ հարց ծագում՝ ի՞նչ եք մենք անում, ո՞րն է այս կառավարության կոնցեպցիան: Ունենք զրոյական աճ, բայց վերցնում ենք 180 մլն դոլարի վարկ` ավելացնելով պետական պարտքը: Մենք հասկանո՞ւմ ենք՝ ուր ենք շարժվուոմ: Տպավորություն է, որ չկա որեւէ կոնցեպցիա, կա միայն օրվա հարցը լուծելու մտադրություն: Ուղղակի այսօր փող է պետք, դրա համար էդ փողը վերցնում ենք, առանց մտածելու, թե հետո ինչ ենք անելու»,- ասաց Զուրաբյանը:
Ֆինանսների փոխնախարարը նշեց, որ միջազգային ստանդարտներով մեր երկիրը նվազ պարտքայի բեռ ունեցող երկիր է համարվում։ «Մեր ջանքերն ուղղված են տնտեսական լարվածության թուլացմանը։ Մտածել, որ առանց պարտք վերցնելու կարող ենք առաջ գնալ, սխալ է»,-ասաց Հայրապետյանը։
Ազգային ժողովի ԲՀԿ խմբակցության պատգամավոր Միքայել Մելքումյանին էլ է հետաքրքրում է, թե ինչ նպատակի համար է մեր երկիրը 40 մլն եվրոյի վարկ վերցնում:
Արմեն Հայրապետյանը նշեց, որ այս վարկը նպատակային չէ, այլ բյուջետային, հետևաբար ուղղվելու է բյուջեի դեֆիցիտը վերացնելուն:
Պատգամավորը զարմացած արձագանքեց. «Փաստորեն, բյուջեի փողը չի հերիքում, վարկ ենք վերցնում, որ փակե՞նք այդ բացը, կարո՞ղ եք աշխատավարձ տալ այդ գումարից»:
Արմեն Հայրապետյանը համաձայնվեց. «Բյուջեն հավասարակշռված փաստաթուղթ է, եթե նախատեսում ենք, որ եկամուտները կլինեն 80 միավոր, իսկ ծախսերը` 100, այդ 20 միավորը պետք է փակենք ներքին եւ արտաքին միջոցներով: Թե այդ ֆինանսավորման որ մասն ուր կգնա, կարևոր չէ, որովհետեւ սա բյուջեին աջակցող վարկ է»:
