ԵՐԵՎԱՆ, 21 դեկտեմբերի – Sputnik. Թուրքիայից ՀՀ ներկրվող բոլոր սննդատեսակները լաբորատոր մանրակրկիտ փորձաքննության են ենթարկվում,- այսօր լրագրողներին ասաց ՍԱՊԾ սննդամթերքի անվտանգության և որակի հսկողության տեսչության պետ Վահե Դանիելյանը։
Նրա խոսքով` սննդամթերքի անվտանգության պետական ծառայությունը վերջին երեք ամսում 120 պետական վերահսկողություն է իրականացրել, հիմնականում` կաթ-կաթնամթերք, միս-մսամթերք արտադրող ընկերություններում, ալկոհոլային և ոչ ալկոհոլային խմիչքների արտադրությամբ զբաղվող ընկերությունների մոտ, ինչպես նաև հանրային սննդի ու իրացման ցանցերի ոլորտում։
Դանիելյանը հայտնեց, որ տարվա ընթացքում իրականացվել է ավելի քան 1020 պետական վերահսկողություն։
«Սննդամթերքի անվտանգության բնագավառը կարգավորող օրենսդրության պահանջների անհամապատասխանություններ են արձանագրվել՝ պիտանելիության ժամկետն անցած սննդամթերքի վաճառքի դեպքեր, մակնշման, հիգիենայի անհամապատասխանության դեպքեր, բոլոր դեպքերով տրվել են հստակ հանձնարարականներ և հետևողական ենք դրանց կատարմանը»,- ասաց Դանիելյանը:
Հայտնաբերված թերությունները չշտկած ընկերությունների գործունեությունը կասեցվել է, ոմանց արտադրանքը հանվել է շրջանառությունից և ոչնչացվել:
Ըստ նրա` նախատոնական և հետտոնական խիստ վերահսկողություն է իրականացվելու սննդամթերքի իրացման շուկայում։
Քաղաքացիները, սննդամթերքի որակի հետ կապված խնդիրներ հայտնաբերելու դեպքում կարող են ահազանգել այդ մասին:
«Այս ամենի նպատակը մեկն է՝ սպառողին հասցնել պատշաճ որակի սննդամթերք: Ամեն դեպքում, մինչ այժմ ժամկետանց սննդի իրացման դեպքեր չեն հայտնաբերվել: Վիճակը կայուն պահելու նպատակով մտադիր ենք ծառայությունում ձևավորվել խորհուրդ, որում ներգրաված կլինեն հասարակական կազմակերպությունների ներկայացուցիչներ, բժիշկներ և մասնագետներ՝ վերահսկողական առավել արդյունավետ աշխատանք կազմակերպելու նպատակով»,- նշեց պաշտոնյան։
«Հստակ գրաֆիկով հերթապահություն է սահմանվում դեկտեմբերի 23-ից մինչև hունվարի 8-ը՝ ամենօրյա շրջայցերով»,- հայտնեց տեսչության պետը:
Նա նշեց նաև, որ սննդամթերք տեղափոխող բոլոր ավտոմեքենաներն այսուհետև պետք է անպայման սանիտարական անձնագիր ունենան:
