ԵՐԵՎԱՆ, 21 դեկտեմբերի — Sputnik. Հարավային Կովկասի տարածաշրջանում Ռուսաստանի ներկայությունը, ինչպես նաև հայ-ռուսական ռազմաքաղաքական համագործակցության խորացումը կարևոր զսպող գործոններ են, որ խոչընդոտում են մարտական գործողությունների վերսկսմանը և նպաստում տարածաշրջանային կայունության և անվտանգության պահպանմանը, հայտարարել է Հայաստանի պաշտպանության նախարար Վիգեն Սարգսյանը Lenta.ru-ին տված հարցազրույցում։
«Ռուսական ռազմակայանը մտնում է Հայաստանի տարածքում ստեղծված հայ-ռուսական զորքերի խմբավորման մեջ։ Մենք իրականացնում ենք զորքերի կիրառման օպերատիվ պլանավորում` ելնելով համատեղ անվտանգության ապահովման շահերից, իսկ ռուսական ռազմակայանի ՀՕՊ և ավիացիայի զորամասերն ու Հայաստանի զինված ուժերն իրականացնում են համատեղ մարտական հերթապահություն` լուծելով մեր օդային սահմանների անվտանգության ապահովման կարևորագույն խնդիրը», — ասել է Սարգսյանը։
Նա հիշեցրել է, որ 2010թ-ին ստորագրվել է միջպետական արձանագրություն, համաձայն որի Հայաստանի տարածքում ռազմակայանի գտնվելու ժամկետը 25 տարուց երկարացվել է մինչև 49 տարի, այսինքն` մինչև 2044 թվականը։
«Ցանկանում եմ ընդգծել, որ երկարացման նախաձեռնողը Հայաստանն էր։ Կարևոր է նաև, որ ռազմակայանի տեղակայման ժամկետը երկարացնելու մասին որոշման հետ մեկտեղ, զգալի շտկում է մտցվել նրա մանդատի ձևակերպման մեջ։ Առաջ բազան պատասխանատու էր միայն նախկին ԽՍՀՄ արտաքին սահմանների երկայնքով պաշտպանության կազմակերպման համար, հիմա ռազմակայանը Հայաստանի պաշտպանության մասն է», — ասել է Սարգսյանը։
Անդրադառնալով ղարաբաղյան հիմնախնդրին` նախարարը չի բացառել մարտական գործողությունների վերսկսման հնարավորությունը` միաժամանակ ընդգծելով, որ Հայաստանին և տարածաշրջանի մյուս երկրներին ձեռնտու չէ հակամարտության թեժացումը։
«Պատերազմի վերսկսումը լուրջ սպառնալիք կլինի ամբողջ Հարավային Կովկասի համար», — ասել է Սարգսյանը։ Նրա խոսքով` ադրբեջանական կողմը ձախողում է միջազգային հանրության, մասնավորապես ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) բոլոր փորձերը` ուղղված հակամարտության լուծման հնարավոր ուղիներ գտնելուն։ «Ընթացիկ տարվա ապրիլին Ադրբեջանը լայնածավալ ռազմական արկածախնդրություն է ձեռնարկել Լեռնային Ղարաբաղի դեմ, որը ձախողվել է։ Մենք կառուցում ենք մեր աշխատանքը մարտական գործողությունների վերսկսման հնարավոր կանխավարկածի վրա», — ասել է նա։
